Foto: MNÝ
Memleket basshysy Qasym-Jomart Toqaev jasandy ıntellekt salasynda el azamattarynyń saýatyn arttyryp, biliktiligin arttyrýdyń mańyzdylyǵyn únemi aıtyp keledi. Mańǵystaý oblysyna jumys saparynda da Prezıdent jańa tehnologııalar men JI baǵyttaryn damytýdyń ózektiligine erekshe nazar aýdardy.
JI syn-qaterlerine arnalǵan legaton taqyryby Ala-Too Halyqaralyq ýnıversıteti (Qyrǵyzstan), ÝrGIýÝ (Ekaterınbýrg, Reseı), «Joǵary ekonomıka mektebi» Ǵylymı-zertteý ýnıversıteti (Máskeý, Reseı), TGIýÝ (Tashkent, О́zbekstan), MNU (Astana), Yessenov University (Aqtaý), Ál-Farabı atyndaǵy QazUÝ, AlmaU, Abylaı han atyndaǵy QazHQjÁTÝ (barlyǵy Almaty qalasynan) stýdentteriniń erekshe qyzyǵýshylyǵyn týdyrdy.
Zań salasyndaǵy chempıonat zertteý forýmymen biriktirildi. Toǵyz stýdenttik komanda eki kún boıy jasandy ıntelektiniń adam quqyǵyna áseri, saladaǵy syn-qaterler keısin taldap, normatıvtik tásilderdi ázirledi. Odan bólek sıfrlyq quqyqtyń ózekti máseleleri jóninen zertteý jobalaryn qorǵady.
«Legathon óz ómirin zań ústemdigi men ádilettilikti ornyqtyrýǵa arnaǵan rektor Maqsut Sultanuly Nárikbaevtyń týǵanyna 85 jyl tolýyna oraı ótip jatyr. Biz ıdeıalar birigetin keńistik qurǵymyz keledi, al stýdentter tek qatysýshylar emes, jańa zań sheshimderiniń teń avtorlaryna aınalady», dep atap ótti MNU basqarma tóraǵasy Talǵat Nárikbaev.
Stýdentter densaýlyq saqtaý salasynda JI paıdalaný keısi boıynsha sheshimderdi jáne avtorlyq zertteýlerdi usyndy. Olar derbes JI-júıelerdi jaýapkershilikke tartý, jeke tulǵanyń sandyq kóshirmelerin modeldeý syndy taqyryptardy qaýzady.
Qatysýshylar jumysyn Bas prokýratýra, Ádilet mınıstrligi, Joǵarǵy Sot ókilderi men jetekshi halyqaralyq jáne qazaqstandyq zań kompanııalarynyń seriktesterinen quralǵan joǵary kásibı qazylar alqasy baǵalady.
«Barlyǵy joǵary deńgeıde, tipti usaq-túıekke deıin oılastyrylǵan. Mysaly, biz tek daýys bergennen keıin ǵana qatysýshylardyń qaı ýnıversıtetten kelgenderin bildik. Mundaı jarystar stýdentterge naǵyz praktıka men baǵa jetpes tájirıbe alýǵa múmkindik beredi», dedi Ádilet vıse-mınıstri Danıel Vaısov.
Birinshi oryn Reseıden kelgen «Joǵary ekonomıka mektebi» ǵylymı-zertteý ýnıversıtetiniń stýdentterine buıyrdy. Júlde qory 1,7 mıllıon teńgeni qurady.
«Is-sharanyń atmosferasy keremet. Bizdiń jumysymyzdyń joǵary baǵalanǵanyna qýanyshtymyz», dedi top múshesi Tatıana.
