Joba aýyl sharýashylyǵy, avtomobıl jáne temirjol qurylysy sekildi strategııalyq mańyzy bar salalarda synalyp kórmek.
«Bul bıýdjet qarjysynyń jumsalýyna baqylaýdy kúsheıtýge yqpal etedi. Qarjyny ıgerý kezinde ashyqtyqty qamtamasyz etip, jemqorlyq qaýpin azaıtý úshin mańyzdy quralǵa aınalady. Bıýdjetten qarjy bólýden bastap, ony tolyq ıgergenge deıingi kezeńdi baqylaýǵa múmkindik beredi. Ár teńgege biregeı sıfrlyq belgi qoıyldy. Endi qarjyny jymqyrý múmkindigi bolmaıdy», deıdi N.Jahın.
Onyń dereginshe, «Aqshany boıaý» jobasy Atyraý oblysyndaǵy Muqyr – Qulsary baǵytyndaǵy joldy jóndeý jobasynda qoldanylmaq. Atalǵan joldy jóndeýge 2,1 mlrd teńge bólingen. Al joldy jóndeýge «QazAvtoJol» UK» AQ tapsyrys berip otyr. Merdigerlikke «Atyraýınjstroı-AIS» JShS tańdalypty.
«Jobaǵa bólingen qarjynyń 100 mln teńgesi sıfrlyq belgimen tańbalandy. Bul soma ulttyq valıýtaǵa aıyrbastaldy. Shartqa sáıkes qurylys materıaldaryn jetkizetin «Naqzat» JShS-nyń esepshotyna aýdaryldy», dep málimdedi N.Jahın.
Jol jóndeýge qajetti qurylys materıaldaryn temirjolmen Muqyr stansasyna jetkizý kózdelgen. Osy aıda stansaǵa 45 vagonǵa tıelgen materıaldar jetkiziledi. Qazir bul stansada 30 vagonǵa arnalǵan temirjol tuıyǵy, jumys kúshi, arnaıy tehnıka bar. Materıaldardy túsirýge arnalǵan aýmaq jaryqtandyrylyp, qorshalǵan. Nysan qurylys tehnıkalarymen qamtamasyz etilgen.
«Shart 2024 jylǵy qarashada jasaldy. Jumystyń aıaqtalý merzimi 2025 jyldyń sońyna josparlanyp otyr. Jol qurylysy mamyr aıynda bastalady. «Zań men tártip» qaǵıdatyna sáıkes bul joba óńirlik departamenttiń baqylaýyna alyndy. О́ıtkeni sıfrlyq teńge platformasy bıýdjet shyǵysynyń ashyqtyǵyn qamtamasyz etedi. Qanatqaqty joba materıaldardy jetkizýshiler men jumysty oryndaıtyn merdigerlerge deıingi barlyq kezeńde bıýdjet qarjysyn maqsatty paıdalanýǵa kepildik beredi. Eń bastysy sybaılas jemqorlyq qaýpiniń aldyn alamyz», deıdi Nurlan Jahın.
Basshy orynbasarynyń pikirinshe, tańbalanǵan sıfrlyq teńge tek kózdelgen jumystardy oryndaýǵa jumsalady. Mundaı qarjyny qolma-qol aqshaǵa aınaldyrýǵa, ózge qajettilikterge qaıta baǵyttaýǵa jol berilmeıdi. Al bul jol 1989 jyly paıdalanýǵa berilgen. Sodan bergi 30 jyldan astan merzimnen beri jóndeý kórmegen. Eki aýdannyń aralyǵyn jalǵaıtyn joldyń jalpy uzyndyǵy –136 shaqyrym, eni – 7 metr. Jol jóndelgennen keıin Qyzylqoǵa jáne Jylyoı aýdanynyń aralyǵyna tikeleı qatynaýǵa bolady.
Qyzylqoǵa aýdanynyń turǵyndary Qulsary qalasyna barý úshin Maqat aýdanyndaǵy Dossor kenti arqyly ótetin jolmen qatynaýshy edi. Aqtóbe men ońtústik, shyǵys jáne soltústik óńirlerinen Mańǵystaýǵa baratyn júrgizýshiler Dossor kenti arqyly aınalyp júredi.
«Joldy tolyq jóndegennen keıin Aqtóbe oblysy baǵytynan kele jatqan kólikter Muqyr aýyly arqyly Qulsary qalasyna tike shyǵady. Bul ásirese júk kólikteri úshin tıimdi baǵyt bolady. Jolda júrý uzaqtyǵy kem degende 2 saǵatqa qysqarady», deıdi jol salasynyń mamandary.
Júrgizýshiler de atalǵan joldyń tezirek jóndelgenin qalaıdy. «Muqyr-Qulsary» baǵytyndaǵy joldyń boıynda eki eldi meken bar. Biri – Qońyraýly, ekinshisi – Tasqudyq. Eki aýyl da Qyzylqoǵa aýdanynyń ákimshilik aýmaqtyq bólinisine kiredi. Qońyraýlyny meken etkender tórt túlikpen kún kórip otyr. Tasqudyq eldi mekeniniń keıbir turǵyny munaı tasymaldaý kompanııasynda jumys istep júr.
Atyraý oblysy
