Sýretti túsirgen – Erlan OMAR, «EQ»
Bıyl 295,3 myń gektar jerge – dándi, 89,7 myń gektar jerge – maıly daqyldar, 12,2 myń gektarǵa – qant qyzylshasy, 6,8 myń gektarǵa – kartop, 8,9 myń gektarǵa – kókónis-baqsha daqyldary jáne 97,3 myń gektarǵa mal azyǵy daqyly egilmek. Basqarma basshysynyń orynbasary Bahtııar Shampıkovtiń aıtýynsha, alqaptardy ártaraptandyrý aıasynda bıdaı – 2,9 myń gektarǵa, qant qyzylshasy – 1,5 myń gektarǵa, dándik júgeri 1,1 myń gektarǵa qysqarady. Arpa, maıly daqyldar, kartop, kókónis-baqsha daqyldary ulǵaıady.
«4,3 myń gektardyń ylǵaly jabyldy. 0,6 myń gektarǵa tyrmalaý jumystary júrgizildi. Eskeldi aýdanynda 44 gektarǵa masaqty dándi daqyl sebildi. Jazdyq aýyl sharýashylyǵy daqyldary tuqymyn zerthanalyq tekserý jasalyp jatyr. Kóksý qant zaýytyna 3 080 sebý birligi shetelden jetkizildi. Tuqymnyń basym bóligi Germanııa, Fransııa, Danııadan alyndy. Sharýalar úshin Kóksý qant zaýyty 6 080 qant qyzylshasy tuqymyn berýge daıyn. Bul 4 677 gektardy qamtıdy», dedi B.Shampıkov.
Bıyl mıneraldyq tyńaıtqyshtardy qoldaný kólemi 58,8 myń tonnaǵa deıin ulǵaıtylǵan (byltyr – 49 myń tonna). Sharýalar 29,6 myń tonna tyńaıtqysh satyp aldy. Qoımada 5,3 myń tonna mıneraldy tyńaıtqysh bar. Kóktemgi dala jumystaryna 5,5 myń tonna arzandatylǵan dızel otyny bólingen. Naýryz aıyna qarastyrylǵan 960 tonna dızel otynynyń 660 tonnasy sharýalarǵa jetkizilipti.
«Kóktemgi dala jáne egindi jınaý jumystaryna «Agrarlyq nesıe korporasııasy» arqyly 14,3 mlrd teńge nesıe qarastyrylǵan. «Keń Dala-1» jáne «Keń Dala-2» baǵdarlamasy boıynsha júıeli jumys júrgizilip jatyr. Sharýalar nesıege bólingen qarjynyń 3,7 mlrd teńgesin alyp, ıgerýde. Búginge deıin 195 sharýashylyqtan 4,8 mlrd teńgege ótinim qabyldanyp, 106 sharýashylyqqa 3,0 mlrd teńge nesıe berildi», deıdi basqarma ókili.
Jetisý oblysynda qant qyzylshasy óndirisin qoldaýǵa arnalǵan jobaǵa Úkimet rezervinen 11,1 mlrd asa qarajat suralǵan. Ondaǵy maqsat – basym daqyldar óndirisin damytý arqyly ósimdik sharýashylyǵy ónimderiniń ónimdiligi men sapasyn arttyrý. Bólinetin qarajat qant qyzylshasyn qaıta óńdeýge jibergen aýyl sharýashylyǵy taýar óndirýshilerine nemese aýyl sharýashylyǵy kooperatıvterine sýbsıdııalar tóleýge baǵyttalmaq.
Jetisý oblysy
