Onyń aıtýynsha, Memleket Basshysy halyqqa Joldaýynda farmasevtıka salasyn damytýdy strategııalyq baǵyt retinde aıqyndap, Úkimetke otandyq óndiristiń úlesin 50 paıyzǵa jetkizý mindetin naqty qoıǵanymen, bul tapsyrmanyń oryndalý barysy kóńil kónshitpeıdi.
«Jalpy Qazaqstanda 97 farmasevtıkalyq óndirýshi jumys isteıdi, onyń 34-i dárilik zattardy shyǵarýǵa jáne 63-i medısınalyq maqsattaǵy buıymdar óndirisine mamandanǵan. Parlament Májilisine otandyq farmasevtıkalyq taýar óndirýshiler toby (budan ári – Kompanııalar) júgindi. Olar Mınıstrlik pen Komıtet tarapynan farmasevtıka ónerkásibi salasyndaǵy bıýrokratııalyq qıyndyqtarǵa tap bolyp otyr. Kompanııalar dárilik zattardy shyǵaryp, olardy emdeý mekemelerine jetkizýmen aınalysady. Olar úshin týyndap otyrǵan problemalardyń negizgi sebebi – óndirilgen dárilik zattardyń saýdalyq ataýyna shekti baǵalardy bekitý týraly Mınıstrliktiń №№ 77, 88 jáne 96 buıryqtar tizbesine engizilý prosesiniń negizsiz, uzaq ýaqytqa sozylýy», dedi depýtat.
Qaırat Balabıevtyń pikirinshe, mundaı kidirister tek óndiristi tejep qoımaı, jańa dárilik zattardyń emdeý mekemelerine ýaqytynda jetpeýine, al bul óz kezeginde halyq densaýlyǵyna qaýip tóndirýine alyp kelip otyr.
«Mınıstrliktiń joǵaryda atalǵan buıryqtardy bekitý tártibin saqtamaýy «SK Farmasııa» JShS-niń biryńǵaı dıstrıbıýtoryna medısınalyq buıymdardy ýaqtyly shyǵarýǵa jáne jetkizýge kedergi keltiredi. Osyǵan baılanysty ınvestısııalyq jobalardy iske qosý merzimi 1 jyldan bastap 9 jyldy quraıdy. Mundaı qıyndyqtar olardyń qalypty qyzmetin damytýǵa, sondaı-aq ınvestısııalyq jobalardy iske asyrýǵa jáne jańǵyrtýǵa kedergi keltiredi. Kompanııalar shyǵarylatyn ónim tizbesiniń tıisti buıryqtarǵa engizilýiniń negizsiz keshiktirilýine baılanysty Mınıstrlik pen Komıtetke birneshe ret júgingen. Mınıstrliktiń derekteri boıynsha, shyǵarylatyn ónimge qatysty barlyq máseleler otandyq taýar óndirýshilerdi qoldaý boıynsha qajetti sharalar qabyldaý úshin Komıtetke ýaqtyly tapsyrylady», dedi Q.Balabıev.
Onyń málimetinshe, 2022 jyldan bastap qazirgi ýaqytqa deıin Komıtet negizsiz sebeptermen Mınıstrliktiń buıryqtaryna Kompanııalar shyǵaratyn ónimderdiń tizbesin engizý prosesin uzaqqa sozyp keledi. Basqa da otandyq farmasevtıkalyq óndirýshiler dál osyndaı jaǵdaıda. Osynyń saldarynan terapııany túbegeıli ózgertetin jáne syrqaty jazylmaıtyn aýrýlardy emdeıtin jańa preparattar qazaqstandyqtarǵa kidirip, óte kesh jetedi.
«Eger Mınıstrlik pen Komıtettiń otandyq óndirýshige degen qatynasy osyndaı bolǵanda, óndiriletin ónimdi vedomstvolyq buıryqtarǵa engizý prosesi 3 jyldan 5 jylǵa deıin keshiktirilse, onda farmasevtıkalyq ındýstrııany memlekettik qoldaý týraly sóz qozǵaýǵa da qajeti joq. Osyǵan baılanysty, eldegi menshikti farmasevtıkalyq óndiristiń úlesi 10 %-dan aspaı, burynǵy deńgeıde qalyp otyr. Sonymen qatar, jasandy túrde jasalǵan bıýrokratııalyq qıyndyqtar farmasevtıka ónerkásibiniń qalypty jaǵdaıda damýyna kedergi keltirip qana qoımaı, sonymen qatar jumys oryndarynyń qysqarý qaýpin týdyrady jáne jıyntyǵynda bankrottyqqa jáne óndiristerdiń jabylýyna ákeletini sózsiz», dedi depýtat.
Saýal sońynda Qaırat Balabıev Úkimetten dárilik zattar men medısınalyq buıymdardy №77, 88 jáne 96 buıryqtardyń tizbesine engizý prosesin jeńildetýdi jáne Densaýlyq saqtaý mınıstrligine atalǵan buıryqtardy shuǵyl qaıta qaraýdy tapsyrǵan jón ekenin atap ótti.
«Farmasevtıka ındýstrııasy ulttyq ekonomıka qurylymyndaǵy negizgi salanyń biri bolyp tabylady jáne tıimdi memlekettik qoldaý jasalǵan kezde ımportqa táýeldilikti azaıtýǵa, sondaı-aq ishki naryqtaǵy dári-dármek baǵasyn turaqtandyrýǵa múmkindik beredi. Sonymen, farmasevtıka salasynda barlyq qajetti sheshimderdiń jedel qabyldanýy, al salany damytý úshin qajetti sharalar kidirissiz iske asyrylýy úshin tıisti sharalar qabyldap, qolaıly jaǵdaılar jasaý qajet», dep túıindedi depýtat.
