Qaladaǵy jeńil atletıkaǵa arnalǵan oblystyq balalar-jasóspirimder sport mektebi 2023 jyly qurylǵan. Mundaǵy 329 bala 4 aýysymmen 1967 jyly salynǵan ǵımaratta jattyǵady. Nysanǵa turǵyzylǵannan beri kúrdeli jóndeý júrgizilmegen.
Oblys ákimi «Lokomotıv» stadıonyn da aralady. Bul aýmaqta kópsalaly sport kesheni men jataqhana salý josparlanǵan. Jobalyq-smetalyq qujattama ázirlenip, saraptamaǵa usynylǵan.
Aımaq basshysy barǵan kelesi nysan - olımpıadalyq rezervtiń oblystyq mamandandyrylǵan balalar-jasóspirimder sport mektebiniń kúres zaly. 1936 jyly salynǵan ǵımaratta balalar grek-rım kúresimen aınalysady. Jalpy sport mektebiniń qaramaǵynda birneshe fılıal men sport zaldary bar. Barlyǵyn qosa alǵanda 1349 bala 15 sport túrimen shuǵyldanady. Álem jáne Azııa chempıonattarynyń júldegerleri bar. Jarystardan 362 medal ıelengen. Kúres zalynyń ǵımaraty kúrdeli jóndeýdi qajet etedi. Jobalyq-smetalyq qujattamasy ázirlengen.
Jaqsylyq Úshkempirov atyndaǵy №1 olımpıadalyq rezervtiń mamandandyrylǵan balalar-jasóspirimder sport mektebinde 1 328 sportshy 9 sport túrimen shuǵyldanady. Ártúrli deńgeıdegi jarystardan 446 medal ıelengen. Mekeme qaramaǵynda dene shynyqtyrý-saýyqtyrý kesheni, kúres zaly, jataqhana, «Dostyq» sporttyq lageri bar. Qazirgi tańda sport kesheni janynan oqý ǵımaratyn ashý qajettigi týyndap otyr. Sebebi, tárbıelenýshiler ózge mektepterge qatynap oqıdy.
Sport mektebiniń kúres zaly men jataqhanasynyń qurylysyna 2016 jyly KAZ Minerals kompanııasy 860,4 mln teńge bólgen. Onyń 530,5 mln teńgesi jataqhanaǵa, 329,9 mln teńgesi kúres zalynyń ǵımaratyna jumsalypty.
Alaıda, oblys ákimdigi baspasóziniń málimetinshe, ǵımarat 2011 jyldan beri kúrdeli jóndeý kórmegen. Sport kesheniniń tóbesinen sý ótip, qabyrǵalarynda jaryqshaq paıda bola bastaǵan. Nysan ishindegi basseın qalada jylytý maýsymy aıaqtalǵannan keıin jumysyn toqtatady.
Oblys ákimi olımpıadalyq rezervtiń qysqy sport túrlerine arnalǵan mamandandyrylǵan balalar-jasóspirimder sport mektebiniń jumysymen de tanysty. Munda 247 bala shańǵy, bıatlon jáne konkımen júgirýmen aınalysady. Ártúrli jarystardan 103 medal ıelengen. Onyń ishinde halyqaralyq jarys júldegerleri de bar. Alaıda sportshylar zaman talabyna saı kelmeıtin alańdarda jattyǵýda. Aımaq basshysyna jańa, halyqaralyq standarttarǵa sáıkes keletin shańǵy-rollerlik trassasyn salý týraly usynys aıtyldy.
Oblys ákimi Semeıdegi sport nysandaryn jańǵyrtý, jańadan salý boıynsha tıisti sheshim qabyldanatynyn aıtty.
«Búgin oblys ortalyǵyndaǵy 10-ǵa jýyq sport nysanynyń jaǵdaıyn kórip, ózekti máselelerimen tanystym. О́kinishke qaraı, sportshylarymyz zaman talabyna saı kelmeıtin zaldarda jattyǵyp júr. Men aralaǵan sport mekemeleriniń barlyǵy kúrdeli jóndeýdi qajet etedi. Qanshama jyldar boıy nazardan tys qalǵan. Soǵan qaramastan sportshylarymyzdyń jetistikteri kóńil qýantady. Aldaǵy ýaqytta qaladaǵy sport ǵımarattary boıynsha tıisti sheshim qabyldaımyz. Eshqaısysy nazardan tys qalmaıdy. Aǵymdaǵy jáne kúrdeli jóndeýdi bastaımyz. Jańa sport ǵımarattaryn salatyn bolamyz», dedi aımaq basshysy.
Abaı oblysy
