Tusaýkeser rásiminde sóz sóılegen Túrki Akademııasynyń prezıdenti, akademık Shahın Mustafaev bul basylym tek kórkem týyndynyń túpnusqalyq rýhyn qaıtarý ǵana emes, sonymen qatar Qazaqstan men Ázerbaıjan arasyndaǵy mádenı baılanystardy nyǵaıtýdyń aıqyn kórinisi ekenin atap ótti.
Muhtar Áýezovtiń atalǵan romany ázerbaıjan tilinde alǵash ret 1954 jyly Eıýp Abbasovtyń tárjimeleýimen, sol kezdegi kırıll qarpinde jaryq kórgen bolatyn. Alaıda ol nusqa orys tilinen aýdarylǵan edi. Odan beridegi 70 jyldan astam ýaqyt ishinde áıgili shyǵarma ázerbaıjan oqyrmandaryna qaıtadan usynylǵan emes.
Bul joly roman qazirgi ázerbaıjan ádebı tili normalaryna saı latyn qarpimen ári qazaq tilindegi túpnusqasy boıynsha salystyryla tekserilip, alǵashqy basylymdaǵy qatelikter túzetilip, kezinde keńestik senzýra sebebimen qysqaryp ketken keıbir tustary tolyqtyrylyp basyldy.
Akademık Shahın Mustafaev romandy jańa álipbımen qaıta basyp shyǵarýǵa atsalysqan redaktor Farıd Hýseınge jáne barsha shyǵarmashylyq topqa rızashylyǵyn bildirdi.
– «Abaı» romanynyń mundaı formatta jaryq kórýi – tek ádebı oqıǵa ǵana emes. Bul – mádenı jadyny jańǵyrtý, ortaq rýhanı muramyzǵa degen qurmet pen ony saqtaý jolyndaǵy naqty qadam. Túrki Akademııasy aldaǵy ýaqytta da túrki halyqtarynyń mádenı-rýhanı murasyn zerdeleý jáne nasıhattaý baǵytyndaǵy keshendi jumystardy jalǵastyra beredi, – dedi Akademııa basshysy.
Tusaýkeserge Ázerbaıjandaǵy Atatúrik ortalyǵynyń jetekshisi Nızamı Djafarov, Ázerbaıjan Mıllı Májilisiniń depýtattary, Qazaqstan Respýblıkasynyń Ázerbaıjandaǵy Tótenshe jáne О́kiletti Elshisi Álim Baıel, TÚRKPA Bas hatshysy Mehmet Súreııa Er, Túrki mádenıeti men murasy qorynyń apparat jetekshisi Fahrı Hadjıev, sondaı-aq ǵylymı jáne bilim berý mekemeleriniń ókilderi, ádebıet jáne mádenıet qaıratkerleri qatysty.
Rınatqyzy Ásemaı
Álikeı Marǵulan atyndaǵy
40 mektep-lıseıi
11 synyp oqýshysy
