№2 Aqtóbe qalalyq sotynda bastalǵan proseske sáıkes, oǵan Qylmystyq kodekstiń "Alaıaqtyq" babymen aıyp taǵylǵan. Is materıaldaryna súıensek, 2018 jyldan bastap 2024 jylǵa deıin ol 90 adamdy aldap, iri kólemde qarajat jymqyrǵan.
О́zin shyǵys halyq medısınasynyń magıstri jáne kásibı emshi retinde tanystyrǵan Qazybaeva turǵyndardy Aqkól aýylynda marqum inisiniń atyna meshit salý jáne qyzynyń Túrkııada emdelýine aqsha qajet degen jeleýmen sendirip, nesıeler rásimdetken. Ol zardap shekkenderge alǵan aqshany eki aı ishinde qaıtaratynyn aıtyp sendirgen.
— Sulýshash Qazybaeva qasaqana paıda tabý maqsatynda adamdardy aldap, birneshe márte bótenniń múlkin ıemdengen. Bul áreketin uzaq ýaqyt boıy júrgizip kelgen, — dedi memlekettik aıyptaýshy Gúlnazym Álıeva.
Sot otyrysyna jábirlenýshilerdiń birqatary qatysty. Olardyń aıtýynsha, Qazybaevaǵa senip, iri kólemde nesıe alyp bergen.
— Qyzymyzdyń densaýlyǵy úshin em izdep barǵanbyz. Ol otyrmaıdy, júre almaıdy. Sulýshashqa senip, 6 aı em aldyq, biraq nátıje bolmady. О́zim 2,5 mln teńge, joldasym 2 mln teńge nesıe aldy. Qazir ol qara tizimge enbeý úshin qaryzdy ózi ótep jatyr. Biz saıajaıda turamyz, — dedi jábirlenýshi Gúlbaný Naýanova.
Aıyptalýshynyń eki qyzy bar, ózi otbasyly. Ol sot prosesiniń jabyq ótýin suraǵanymen, is zań talaptaryna sáıkes ashyq túrde qaralyp jatyr.
