Alla Gavrınanyń aıtýynsha, búginde «Assambleıa jastary» – quramynda on myńnan astam patrıot jasty biriktirgen qýatty uıym.
«Jyldar boıy Assambleıa biz úshin áleýmettik lıft, eldiń tynys-tirshiligine etene aralasýdyń biregeı platformasy boldy. 2021 jyly QR Prezıdenti Q.Toqaev barlyq jastar qurylymdaryn bir arnaǵa toǵystyryp, «Assambleıa jastary» uıymyn qurýǵa bastamashy boldy. Qazir elimizdiń barlyq óńirinde fılıaldar, 60-tan astam jetekshi oqý ornynda stýdenttik assambleıalar jumys júrgizip otyr», dedi ol.
Sonymen qatar Alla Gavrına jastardyń qazirgi tańda máslıhattarda, qoǵamdyq keńesterde, keńesshi qurylymdarda belsendilik tanytyp jáne memlekettik basqarý isine tikeleı aralasyp otyrǵanyn aıtty. Olardyń nazaryndaǵy basty jobalar – «Taza Qazaqstan», áleýmettik keseldermen kúres, ulttyq qundylyqtardy dáripteý men memlekettik tildi meńgerý.
Assambleıa quramyndaǵy jastar qazaq tilin erkin meńgerip, ózge etnos ókilderine de úıretip júr. Qazaq tilin nasıhattaýda erekshe avtorlyq ádisterimen tanylǵan Vladıslav Ten, Olga Spırına, Alına Kan, Aleksandra Myskına sııaqty jastar – búgingi tańda qazaqtildi frontmenderge aınaldy.
Birlik pen shyǵarmashylyqtyń taǵy bir kórinisi – «Assambleıa quramasy» komandasynyń jetistigi. Olar Qazaqstan halqy Assambleıasynyń 30 jyldyq mereıtoıy qarsańynda «Jaıdarman» Ulttyq lıgasynyń jeńimpazy atanyp, jastardyń kreatıvi men birligin pash etti.
«Búgingi tańda tilimiz qazaqstandyq etnostar arasynda berik ornady deýge tolyq negiz bar. Qazaq tiliniń etnosaralyq tilge aınalýynyń aýyly alys emes.10 jyl buryn etnostar arasynda qazaq tildi spıkerler tańsyq bolsa, búginde ol – qalypty jaǵdaı. Osylaısha, qazaq tilin nasıhattaý meniń de ómirlik mıssııama aınaldy.Qazir bizdiń aldymyzda qazaq tilin úırený máselesi turǵan joq. Meńgerdik, oıymyzdy erkin jetkize alamyz. Joǵaryda aty atalǵan áriptesterimniń maqsaty – ózgelerge til úırenýge yqpal etý», dedi Alla Gavrına.
Onyń aıtýynsha, búgingi jastar – ortaq qundylyqtardy ustanatyn, tarıhty qurmetteıtin, bilim men eńbekke qushtar, ádilettilik pen meıirimdilikti temirqazyq etken urpaq. Osylaısha, «Adal azamat» ıdealy shyn máninde júzege asa bastady.
Sonymen qatar Alla Gavrına Assambleıanyń 30 jyldyǵy aıasynda ulttyq birlikti nyǵaıtý jáne jas býynnyń azamattyq sanasyn arttyrý maqsatynda «Men qazaqstandyqpyn» jáne «Meniń kógildir tólqujatym» atty iri jobalar júzege asyrylyp jatqanyn atap ótti. Sondaı-aq ol qazirgi kúrdeli geosaıası ahýalda el ishindegi turaqtylyq pen tynyshtyqty saqtaý asa mańyzdy ekenin basa aıtty.
«Jyldar boıy Assambleıanyń aldyńǵy aǵa býyn ókilderi eldiń egemendigin, tutastyǵy men birligin saqtaýda janyn aıamady. Kezek bizde. Biz, Assambleıada ornyqqan tájirıbeniń arqasynda osy mıssııany jalǵastyramyz», dedi ol.
Alla Gavrına sózin qorytyndylaı kele, Assambleıanyń negizgi qyzmeti – táýelsizdikti tuǵyrly etý, eldiń tutastyǵy men ishki turaqtylyǵyn saqtaý jáne birlik pen kelisimdi nyǵaıtý bolyp qala beretinin atap ótti.
