2023 jyly kúzde Abaı eline arnaıy kelgen Joǵarǵy Sot tóraǵasy Aslambek Merǵalıev bolashaq nysannyń ornyna sımvolıkalyq kapsýla salyp, qurylystyń bastalýyna negiz qalaǵan edi.
Rásimge Joǵarǵy Sottyń ákimshilik ister jónindegi sot alqasynyń tóraǵasy Aslan Túkıev, Abaı oblysynyń ákimi Berik Ýálı, Sot ákimshiligi basshysynyń birinshi orynbasary Shákir Shaıahmetov, sýdıalar, jergilikti atqarýshy organdardyń ókilderi, sot júıesiniń ardagerleri men qoǵam qaıratkerleri qatysty. Ashylý saltanatynda sóz sóılegen Aslan Túkıev Prezıdenttiń zań ústemdigin nyǵaıtýǵa jáne adam quqyqtaryn qorǵaýǵa erekshe mán beretinin atap ótti. Onyń aıtýynsha, jańa ǵımaratta azamattarǵa qolaıly jaǵdaı jasalǵan, al sot korpýsy ádil sot tóreligin qamtamasyz etýge baǵyttalǵan.
Oblys ákimi Berik Ýálı bul qurylystyń sot ınfraqurylymyn damytýdaǵy mańyzdy qadam ekenin jáne Semeı qalasynyń sáýlettik kelbetimen úılesim tapqanyn basa aıtty. Oblystyq sot tóraǵasy Qaırat Chakpantaev ǵımarattyń qalanyń qarqyndy damyp kele jatqan aýdanynda zamanaýı talaptarǵa saı salynǵanyn aıtty. Ol sýdıalardyń sotqa degen senimniń artýyna óz úlesterin qosatynyna senim bildirdi. Sot júıesiniń ardageri Kenjesh Muqashovtyń batasynan keıin qonaqtar sot zaldaryn, ózine-ózi qyzmet kórsetý termınaldary bar front-keńseni, sondaı-aq sýdıalar, prokýrorlar, advokattar jáne medıatorlar kabınetterin aralap kórdi. Birinshi qabatta sot keńseleri, salqyndatqyshy bar kútý zaldary, teledıdarlar jáne aqparattyq stendter ornalasqan.
Sapar barysynda Aslan Túkıev oblystyń sot korpýsymen de kezdesip, sot júıesindegi reformalardyń barysyn talqylady.
