Mundaı mádenı is-shara oblystyq mádenıet, arhıvter jáne qujattama basqarmasynyń qoldaýymen ekinshi ret ótip otyr. Aımaqtyq deńgeıde ótken baıqaýǵa 50-ge jýyq qatysýshydan ótinim túsken. Usynylǵan aýdıoertegiler arasynda qazaq, orys halqynyń ertegileri, sondaı-aq avtorlyq ertegiler bar.
«Baıqaýǵa kelip túsken materıaldardyń barlyǵyn tyńdap, uıymdastyrýshylar usynǵan baıqaý ólshemderine saı baǵalap shyqtyq. Osy jumysty atqarý barysynda qatysýshylardyń eńbekqorlyǵyna, jaýapkershiligine, sheberlikterine súısindik. Kórý qabileti buzylǵan balalardyń ereksheligin esepke ala otyryp, ertegi oqýǵa qoıylatyn talaptardy saqtaýǵa tyrysqan. Qatysýshylardyń deni jalpy bilim beretin mektep muǵalimderi men kitaphanashylar boldy», deıdi Jazýshylar odaǵynyń múshesi, Bóketov atyndaǵy Qaraǵandy zertteý ýnıversıtetiniń aǵa oqytýshysy, qazylar alqasynyń tóraǵasy Saltanat Keńesbekova.
Bul baıqaýǵa Almaty, Qaraǵandy, Aqtóbe, Qyzylorda, Ońtústik Qazaqstan, Soltústik Qazaqstan, Batys Qazaqstan, Shyǵys Qazaqstan, Ulytaý oblystary men Astana, Almaty, Shymkent qalalarynan jáne oblysymyzdyń Balqash, Temirtaý qalalary men Buqar jyraý, Nura, Aqtoǵaı aýdandarynan 50-ge jýyq shyǵarmashylyq jumys túsken.
Sonymen, «Zalym túlki» aýdıoertegisin sheber taspalaǵan Batys Qazaqstan oblysy, Oral qalasynan Gúlmaıra Samenova men «Teremok» orys halyq aýdıoertegisimen qaraǵandylyq Ekaterına Fedotova birinshi oryn aldy.
Al ekinshi oryndy «Qarlyǵashtyń quıryǵy nege aıyr?» qazaq halqynyń aýdıoertegisimen Ulytaý oblysy, Jańarqa aýdanynan Gúlmaıra Jaqypova men Sharl Perronyń «Kot v sapogah» aýdıoertegisi úshin qaraǵandylyq Roman Ten ıelendi.
Úshinshi oryn «Momynbaı men jeti qaraqshy» aýdıoertegisimen Qyzylorda oblysynan Erkebulan О́teýov pen «Ormandaǵy úıshik» orys halqynyń ertegisi úshin Balqash qalasynan Merýert Ýtenovaǵa buıyrdy.
Munymen qosa, «Úzdik aýdıoqoıylym» atalymynda «Bes eshki» shyǵarmasy úshin Shymkent qalasynan qatysqan Kámshat Appazova men «Lýchshıı chtes» atalymy boıynsha «Vzdornyı vorobeı» aýdıoertegisi nuralyq Raýshan Ivashkına yntalandyrý syılyǵymen marapattaldy. Júldegerlerge dıplom men qarjylaı syılyq berildi.
Qaraǵandy oblysy
