Quleke batyr – Abylaı hannyń oń tizesin basa otyrǵan aqylshy-batyrlarynyń biri. Han ony Reseı, Qytaı memleketteri arasyndaǵy elshilikterge de jiberip, dıplomatııalyq isterge jumsap otyrǵan. Quleke týraly kezinde:
«Qudaı jaqsy jaratqan Qulekeni aıt,
Elde jaqsy bar bolsa bir-ekenin aıt.
Atyǵaıda tórt qasqa batyr ótken
Janteli, Jápek, Tileke, Qulekeni aıt», degen sóz qalǵan.
Qulekeden Bábeke, Móńke, Tileýke, Shardaq, Qazaqbaı, Júsip atty alty ul týady. Osyndaǵy Tileýke aqyn, fılosof, aqylyna qarap jasynan shal atanǵan Shal aqyn.
Qazaqbaıdyń bir balasy – Bekmyrza. Onyń Jantileý degen balasynan Qoshan týyp, al odan ataqty akademık Amanjol Qoshanovtyń taraǵanyn bilemiz. Bul atanyń urpaǵy ejelden qarymdy, tekti, bilimdi, ataly ekeni kórinip tur.
Bekmyrza 1903–1904 jyldary qasyna elden Ybyraı jáne taǵy bir jigitti ertip, qajylyqqa barǵan. О́zi 60-tan jańa ǵana asqan jasta bolsa kerek. Osy saparda Bekmyrzanyń Alla buıyrǵan ajal saǵaty jetip, sheıit bolady. Al onyń zámzám sýy jáne basqa da zattar salǵan sandyǵyn elge Ybyraı men qasyndaǵy jigit aman-esen jetkizip, urpaǵy Jantileýdiń úıine tapsyrady. Sodan beri bul sandyq ǵasyrdan artyq ýaqyt boıy Quleke batyr urpaqtarynyń bastan keshken oqıǵalarynyń kýási bolyp turǵan.
Jýyrda osy sandyqty Jantileýdiń nemeresi Murat aqsaqal óz qolymen Qyzyljardaǵy Islam mádenıetiniń mýzeıine tapsyrdy.
PETROPAVL
