Foto: ashyq derekkóz
Úndi tarapy áýe qatynasy men saýdany doǵaryp, dıplomattardy elden shyǵaryp jatyr. Sonymen qatar, sý resýrstaryn birlesip paıdalaný jónindegi 1960 jyly jasalǵan kelisimnen shyǵatynyn málimdedi. Al Pákistan úkimeti eger Úndistan sý jetkizýdi toqtatýǵa tyryssa, bul áreketti soǵys jarııalaý dep qabyldaıtynyn eskertip otyr.
Úndistan polısııasy oqıǵaǵa qatysy bar dep kúdikke ilingen úsh sodyrdyń aty-jónin jarııalady. Olardyń ekeýi pákistandyq azamattar ekeni habarlandy.
Pákistannyń burynǵy aqparat mınıstriniń mindetin atqarýshy Mýrtaza Solangı sońǵy jaǵdaıǵa baılanysty pikir bildirip, ahýaldyń asa kúrdelenip bara jatqanyn atap ótti.
«Bul joly jaǵdaı áldeqaıda qaterli kezeńge ótip otyr. Halyqaralyq tártiptiń buzylýy men úndilik aqparat quraldaryndaǵy úreı Úndistan Premer-mınıstri Narendra Modıdiń sabyrly ári salmaqty sheshim qabyldaýyna kedergi keltirip tur. Eger Úndistan bul essizdikti toqtatpasa, eki tarap ta utylady», deıdi Mýrtaza Solangı.
Sársenbi kúni keshke Úndistan Pákistanmen dıplomatııalyq qarym-qatynastyń deńgeıin tómendetip, elshilikterdegi qyzmetkerler sanyn eki esege qysqartty. Sonymen qatar, eki el arasyndaǵy jalǵyz qurlyq shekara ótkeli jabylyp, Ind ózeni boıynsha jasalǵan kelisimniń kúshi ýaqytsha toqtatyldy. Ońtústik Azııa aımaqtyq yntymaqtastyǵy qaýymdastyǵy aıasynda pákistandyqtarǵa berilgen vızalar úsh kún ishinde joıylmaq.
Beısenbi kúni Pákistan úkimeti de birqatar jaýapty sharalardy qolǵa aldy. Atap aıtqanda, Úndistan azamattaryna arnalǵan vızalar berýdi toqtatty sıkh zııaratshylarynan basqa, úndilik áskerı keńesshilerdi «bılikke unamsyz» dep tanyp, elden shyǵýǵa nusqaý berdi.
Sonymen qatar, Pákistan áýe keńistigin Úndistanǵa tıesili nemese sol el tarapynan basqarylatyn barlyq áýe kompanııalary úshin japty. Vagah shekara beketi men eki el arasyndaǵy barlyq saýda, sonyń ishinde tranzıttik tasymal da toqtatyldy.
Pákistan tarapy Ind ózeni arqyly sý jetkizýdi toqtatýǵa baǵyttalǵan kez kelgen áreketke «soǵys aktysy» retinde qaraıtynyn jáne oǵan tıisti túrde jaýap beretinin málimdedi.
Pákistan úkimeti taratqan málimdemede bul shabýylǵa baılanysty naqty ári rastalǵan tergeý nátıjeleriniń joqtyǵy aıtylyp, Úndistannyń shabýyldy Pákistanmen baılanystyrý áreketteri «oısyz, qısynsyz jáne logıkaǵa qarsy» dep baǵalandy.
