Lavrov CBS News arnasyna bergen suhbatynda: «AQSh prezıdenti bizdiń baǵyttyń durystyǵyna senedi, ony bilemin. Biz kelissózdi júzege asyrýǵa daıynbyz. Alaıda eskeretin kiltıpandar jáne bar. Ony retteý kerek. Qazir biz sonymen aınalysyp jatyrmyz», dedi ol.
Sondaı-aq syrtqy ister mınıstri Donald Tramptyń Ýkraınada daǵdarysynyń túpki sebebin joıý qajettiligin jete túsinetin álemdegi jalǵyz basshy ekenin jetkizdi.
Keshe Londonda AQSh, Eýropa jáne Ýkraına delegasııalary arasynda qaqtyǵysty retteý boıynsha kelissózder ótedi dep josparlanǵan bolatyn.
Washington Post basylymynyń málimeti boıynsha, AQSh óziniń eýropalyq odaqtastarymen jáne Ýkraınamen kelissózder júrgizý barysynda Qyrymdy Reseıdiń quramynda dep tanýdy usynýdy josparlaǵan. Iаǵnı, AQSh tarapynan Ýkraına men Eýropa elderine Qyrymdy Reseıdiń terrıtorııasy retinde moıyndaý týraly usynys jasalmaq bolǵan.
Al Kıevtiń odaqtastary, ıaǵnı Ýkraına men onyń batys elderindegi seriktesteri, bul usynysqa qarsy bolǵan. Olar bul jaǵdaıdyń ornyna Ýkraınaǵa qaýipsizdik kepildikterin berýdi talap etken. Qaýipsizdik kepildikteri degenimiz — Ýkraınaǵa halyqaralyq deńgeıde qorǵanys qamtamasyz etý, onyń ishinde NATO nemese basqa elder tarapynan áskerı qoldaý kórsetý. Olar negizinen Ýkraına aýmaǵynyń tutastyǵyn qorǵaýǵa baǵyttalǵan halyqaralyq zańdar men kelisimder aıasynda, Qyrym máselesin keıinge qaldyryp, Ýkraınaǵa qaýipsizdik sharalaryn nyǵaıtýdy usynǵan.
Biraq AQSh-tyń Memlekettik hatshysy Marko Rýbıo men Tramptyń arnaıy ókili Stıv Ýıtkoff kelissózderge barýdan bas tartty. Buǵan qosa Ulybrıtanııa, Fransııa jáne Germanııanyń syrtqy ister mınıstrleri de kezdesýge qatysýdan shet qaldy. Nátıjesinde, kezdesýler joǵarǵy deńgeıde ótpedi. Washington Post basylymy habarlaǵandaı, kelissózderdiń sátsizdigine Vashıngtonnyń Kıevtiń aýmaqtyq ustanymdardan bas tartýdy qabyldamaı, aldymen atysty toqtatý máselesin talqylaýdy talap etýi sebep bolǵan.
