Týrnırge Los-Andjeles, San-Dıego, Sakramento, San-Hose, Hıýston, Chıkago jáne Las-Vegastan kelgen qazaq komandalary qatysty. Jarys bir kúnge sozylyp, qatysýshylar men jankúıerler arasynda jaqsy áser qaldyrdy.
Aıtarlyǵy, ıgi shara AQSh-taǵy qazaq dıasporasy úshin tek sporttyq jarys qana emes, sonymen qatar jańa dostyq baılanys ornatý, ortaq qundylyqty bólisý men ulttyq biregeılikti saqtaý jolyndaǵy úlken qadam boldy. Qazaq Unity Cup-tyń aldaǵy jyldary dástúrli túrde ótetini josparlanyp otyr.
Eldegi istiń sheteldegi jalǵasy
Shalǵaıdaǵy otandastardyń basyn qosyp, sportqa baýlyp júrgen Unity Leagues kompanııasynyń negizin qalaýshy Talǵat Toqbergen degen azamat. Ol Ońtústik Kalıfornııada áýesqoı sportshylarǵa arnalǵan lıga men týrnırler uıymdastyrýmen aınalysady.
Bul iste Talǵattyń tájirıbesi mol. 2014 jyly Almaty qalasynda Unity League atty alǵashqy áýesqoı fýtbol lıgasyn qurdy. Bul joba sátti iske asyp, áli kúnge deıin jumys istep keledi. Keıinirek Astanada «Birlik lıgasyn» ashýǵa kómektesip, onyń damýyna zor úles qosty. Al 2016 jyly Astana, Qaraǵandy, Shymkent, Qyzylorda men Almaty qalalarynan jınalǵan komandalar arasynda jalpyqazaqstandyq fýtbol lıgasyn uıymdastyrdy. Árbir izgi isi Talǵattyń san qyrly qabiletin shyńdap, bolashaq jobalaryna berik irgetas qalady.
Jyldyń jaqsy jospary
Bıyl Unity Leagues jańa jobalar arqyly óz keńistigin keńeıtýdi kózdep otyr. Kompanııa aldaǵy mamyr aıynda áýesqoı oıynshylar arasynda voleıboldan týrnır ótkizedi. Jazda aptalyq formattaǵy turaqty mını-fýtbol lıgasyn ashady. Sondaı-aq jyldyń ekinshi jartysynda AQSh-tyń basqa shtattarynda Unity Leagues fılıaldaryn qurýdy josparlap otyr. Bul arqyly kompanııa ózge aımaqtardaǵy áýesqoı sport súıer qaýymdy biriktirýdi kózdeıdi.
Birlikke úndeıtin úlgili is
Negizi Talǵat Toqbergenniń bastamalary tek sportpen shektelmeıdi. Ol AQSh-taǵy qazaq jastaryn, otbasylaryn jáne jalpy qaýymdy biriktirýge baǵyttalǵan aýqymdy ıdeıalardy júzege asyryp júr. Sport – adamdardy jaqyndastyratyn, dostyqty nyǵaıtatyn, ári ulttyq rýhty saqtap qalýǵa sep bolatyn kúshti qural. Qazaq Unity Cup pen aldaǵy Unity Leagues jobalary osynyń jarqyn dáleli.
25 sáýir – Qazaqstan fýtboly kúni
2002 jyly dál osy kúni elimiz ÝEFA-ǵa tolyqqandy múshe bolyp qabyldandy. Bul otandyq fýtbol úshin jańa kezeńniń bastamasy boldy. Sodan beri el fýtboly eýropalyq deńgeıde damýǵa umtylyp keledi.
