Foto: Ashyq derekkóz
Qajylyq 10 maýsymǵa deıin jalǵasatyn bolǵandyqtan, osy ýaqyt aralyǵynda qasıetti jerlerge tek arnaıy vızasy bar azamattarǵa ǵana kirýge ruqsat etiledi.
Saýd Arabııasy Ishki ister mınıstrliginiń habarlaýynsha, qajylyqqa ruqsatsyz barýǵa nemese barýǵa árekettengen adamdarǵa 20 myń saýd rıalyna deıin (shamamen 5,3 myń AQSh dollary) aıyppul salynady. Bul shekteý barlyq tıptegi vızalarǵa (týrıstik, jumys, otbasylyq jáne t.b.) qatysty.
Sonymen qatar, ruqsatsyz qajylyq jasaýshylarǵa nemese olardy elge kirgizýge kómekteskenderge 100 myń rıalǵa deıin (shamamen 26 myń AQSh dollary) aıyppul salynyp, sot sheshimimen kólik quraldary tárkilenýi múmkin.
Zańsyz kelgen, vızasy keshiktirilgen nemese elde ruqsatsyz júrgen adamdar deportasııalanyp, olarǵa 10 jyl boıy Saýd Arabııasyna kirýge tyıym salynady.
Memleket qasıetti oryndarda tártipti saqtaý jáne qajylyq maýsymynda qaýipsizdikti qamtamasyz etý maqsatynda osyndaı sharalardy qolǵa alyp otyr.
Sondaı-aq, Saýd Arabııasynyń Týrızm mınıstrligi Mekke qalasyndaǵy barlyq qonaq úılerge qajylyq ruqsaty joq adamdardy ornalastyrýǵa tyıym salǵanyn habarlady.
