Oblys ákimi Nuralhan Kósherov «Qazatomónerkásip» UAK» AQ-nyń basqarma tóraǵasy Meıirjan Iýsýpovpen kezdesip, kompanııanyń óńirdi damytýǵa qoldaýyn kúsheıtý, birlesken jobalardy júzege asyrý, áriptestikti nyǵaıtý joldaryn talqylady. Kompanııanyń oblystyń áleýmettik-ekonomıkalyq damýy men ınfraqurylymyn damytýǵa aýdarymdaryn kezeń-kezeńimen ulǵaıtý máselesi de nazardan tys qalmady. «Kompanııanyń oblysqa qoldaýyn kúsheıtý, Sozaq aýdanynyń eldi mekenderine áleýmettik jáne demeýshilik kórsetý boıynsha birlese jumystar atqarýdy usynamyn. Bir kolledjdi senimgerlik basqarýǵa alyp, tıisti kadrlardy daıarlaýǵa da úles qosady dep senemin», dedi Nuralhan Kósherov. Sondaı-aq oblys ákimi ýran óndirýshi birlesken kásiporyndarynyń bas keńselerin Shymkent qalasynan Túrkistan qalasyna kóshirý máselesin de qarastyrý jóninde usynysyn jetkizdi.
Bul oraıda Meıirjan Iýsýpov usynystardy zerdelep, qarastyratynyn, kompanııa óziniń áleýmettik jaýapkershiligin sezinetinin, áleýmettik nysandar salýǵa demeýshilik kórsetiletinin atap ótti.
Aıta keteıik, 2025 jyldyń qańtar-naýryz aılarynda Túrkistan oblysynyń taý-ken óndirý ónerkásibinde 153 mlrd teńgeniń ónimi óndirilip, NKI 114,1% boldy. О́ńirdiń taý-ken óndirý ónerkásibiniń 98%-y jáne óńdeý ónerkásibiniń metallýrgııa salasynyń 99,8% úlesi «Qazatomónerkásip» UAK» AQ-na tıesili.
