«Qashar keni» AQ-ǵa qarasty jylý ortalyǵy kásiporynnyń óndiris alańymen birge, búkil eldi mekenge jylý, ystyq sý beredi. Buǵan deıin tehnologııa múmkindigi bolmaǵan soń, kent turǵyndary jazda ystyq sýsyz qalatyn. Kúrdeli jóndeý jumysy aıasynda ortalyqtyń energetıkalyq qondyrǵylary tolyqtaı jańartylyp, jylý maýsymynan tys ýaqytta da ystyq sý taratý máselesi sheshimin taýyp otyr.
«Bıyl birinshi ret kún jylyǵan soń da ystyq sý toqtaǵan joq. Soǵan bárimiz qýanyp jatyrmyz. Jylda jylý maýsymy bastalǵansha, elektr sý jylytqyshtaryn paıdalanatynbyz. Onyń da qolaısyz tustary kóp, mundaı qurylǵylar oryn alady ári elektr energııasyn shyǵyndaıdy. Endi, mine, shúmekti ashsańyz boldy, ystyq sý aǵady», deıdi Qashar kentiniń turǵyny Alena Ponomareva.
Jylý ortalyǵyn qaıta jańǵyrtý jobasy aıasynda aýqymdy jumys atqaryldy. Ortalyq bastyǵy Aleksandr Petrýshkov-tyń aıtýynsha, áýeli Qashar kentiniń gaz taratý pýnktinen jylý ortalyǵyna deıin jerasty gaz qubyry salynǵan.
«Odan keıin gazdy retteý pýnkti ornatyldy. Kómir qazandyqtary gaz qazandyqtaryna aýystyryldy. Gaz shyǵaratyn jańa qubyrlar salyndy. Jylý ortalyǵynyń gazǵa aýystyrylýynyń paıdasy kóp. Birinshiden, eldi mekenniń aýasy tazarady. Gaz – otynnyń eń qaýipsiz túri, kómirge qaraǵanda, quramynda zııandy zattar az. Ekinshiden, turǵyn úıler men kásiporyn ǵımarattarynda jyl boıy jyly sý úzilmeıtin bolady. Úshinshiden, gazben janatyn qazandyqtardyń avtomatty basqarý júıesi bar. Bul da osyndaǵy mamandardyń jumysyn edáýir jeńildetedi», deıdi A.Petrýshkov.
Qostanaı oblysy
