Mádenıet jáne aqparat mınıstrliginiń muryndyq bolýymen ótken is-sharaǵa oblys aýdandaryndaǵy medıa ortalyq jetekshileri, san jyldar boıy salada ter tógip kele jatqan tájirıbeli jýrnalıster jáne jýrnalıstıka mamandyǵynda bilim alyp jatqan stýdentter qatysty.
Is-sharada alǵash sóz alǵan Mádenıet jáne aqparat mınıstrligi BAQ salasyndaǵy memlekettik saıasat departamentiniń dırektory Qaınar Ahetov jýrnalıstıkadaǵy búgingi ózgerister, medıasaıasat pen memlekettik organdardaǵy aqparattyq baılanysty nyǵaıtý, jańa deńgeıge kóterý týraly utymdy oıyn ortaǵa saldy.
Keıinnen is-sharaǵa arnaıy qatysqan spıkerler birneshe taqyryp boıynsha baıandama jasap, usynys-pikirlerimen bólisti. О́ńirlik kommýnıkasııalar qyzmetiniń basshysy Almat Sádýaqastyń aıtýynsha, BAQ pen memlekettik organdar arasyndaǵy baılanysty jaqsartý maqsatynda úzdiksiz jumys júrgizilýi kerek.
«Dál qazirgi kezeńde jyldamdyq qajet. Sondyqtan da jyldam ári naqty, dáıekti málimet berýdiń mańyzy zor. Qoǵam qajettiligin óteýde BAQ pen memlekettik qurylymdardyń ózara úılesimdi jumysy sheshýshi rólge ıe ekeni daýsyz. Osy oraıda óńirlik kommýnıkasııalar qyzmeti BAQ ókilderi men memlekettik organdar arasyndaǵy tıimdi is-qımyl, baılanysty, ashyqtyqty qamtamasyz etip otyrǵanyn aıta ketken jón. Baspasóz máslıhatyn uıymdastyrýdaǵy maqsat – esep tyńdaý emes, jarty jyl, bir jyl ishinde atqarylǵan jumystyń sapasyna mán berý. Jýrnalıst baılanysa almaı júrgen basqarma, departament basshylaryn betpe-bet júzdestire alatyn birden-bir oryn – óńirlik kommýnıkasııa qyzmeti alańy. О́ńirlik kommýnıkasııalar qyzmeti halyq tarapynan kelip túsken aryz-shaǵym, saýaldarǵa da der kezinde keri baılanys ornatyp, jaýap berip otyrady. Bul tusta aýdandaǵy medıa ortalyq basshylarynyń, baspasóz hatshylarynyń yqpaly zor», deıdi ol.
Basqosýda sóz alǵan qalamger Baqytjan Mahanuly jalǵan aqparattyń qoǵamǵa tıgizer zııany men medıasaýattylyqtyń mańyzyna toqtaldy. Spıker jýrnalıster men oqyrmandar arasynda syn turǵysynan oılaý daǵdylaryn qalyptastyrý qajet ekenin, aqparatpen jumys isteýdiń jaýapkershiligi artqanyn atap ótti.
«Jambyl» telearnasynyń dırektory Gúlbarshyn Qulanbaeva medıakontentti vızýalızasııalaý ádisterimen bólisip, grafıka, ınfografıka men beınematerıaldardyń aýdıtorııa tartýdaǵy mańyzyn naqty mysaldarmen kórsetti. Sol sekildi jýrnalıstiń baıandaý sheberligi men aýdıtorııamen baılanys ornatý tásilderi aıtyldy. Spıker sendirý, emosııalyq áser jáne tildik stıldiń róline erekshe mán berdi.
Semınar barysynda tek kásibı daǵdylar emes, jýrnalısterdiń áleýmettik máseleleri de qozǵaldy. Qatysýshylar saladaǵy eńbekaqynyń tómendigi men maman tapshylyǵyn ashyq aıtyp, bul máselelerdiń BAQ sapasyna tikeleı áser etetinin jetkizdi.
Jambyl oblysy
