Belgilengen ýaqytta saltanatty sapqa turǵan 300-ge tarta sarbaz úshin mańyzdy sát te kelip jetti. Departament bastyǵy, polkovnık Álibek Kaıýpovtyń buıryǵymen, elimizdiń aspan tústes Týy ortaǵa shyǵarylǵan soń, Ánuran da qalyqtap ala jóneldi. Árbir jannyń judyryqtaı júreginde máńgi saqtalyp qalatyn sátti sýretke túsirip alǵan soń, biz de qolymyzdy keýdemizge qoıýǵa asyqtyq...
«Men qatardaǵy jaýynger...» Ortaǵa shyqqan árbir sarbazdyń aıtar sózi osylaı bastalady. Ári qaraı, Otanyna adal qyzmet etýge ant bergen shekarashyny polkovnık Á.Kaıýpov, Uıǵyr aýdanynyń ákimi B.Eleýsizova men shekarashy ardagerler quttyqtaýǵa kiristi. О́z kezegimizde, biz – departament pen aýdany ákiminiń baspasóz hatshylary da osynaý mańyzdy sátti qalt jibermedik.
Ant qabyldaý aıaqtalǵan soń, jıynnyń negizgi bólimi bastaldy. Aldymen departament bastyǵy «Sarbaz 2.0» baǵdarlamasyna qatysyp, ózderi qalaǵan joǵary oqý ornynda tegin oqýǵa grant utyp alǵan «Kóktem-2024» shaqyrylymynyń jeti sarbazyna sertıfıkat tapsyrdy. Osydan keıin Álibek Amangeldiuly, Bota Serikqyzy, shekarashy ardagerlerdiń atynan otstavkadaǵy polkovnık Dáýletqalı Mamyrhanov sarbazdardy ant qabyldaýymen quttyqtap, aldaǵy qyzmetterine sáttilik tiledi.
Jylyna eki márte, kóktem men kúz aılarynda ótip turatyn mundaı rásimderdi sahnalyq kórinistersiz elestetý múmkin emes. О́ıtkeni jas sarbazdar da, olardyń alystan asyǵyp jetken ata-analary da shekarashylar atqaratyn qyzmet týraly bilýge tıis. Sondyqtan alańǵa birinshi bolyp shyqqan kınolog pen onyń qyzmettik ıti jattyǵýlardy sheber oryndaǵan soń, kezek attyń qulaǵynda oınaıtyn atbegilerge berildi. Tuıaqtarymen jer tarpyǵan qyzmet attary taý men tastyń arasyndaǵy shekara syzyǵyn baqylaýda taptyrmaıtyn kólik ekendigi erteden-aq belgili. Al shekara buzýshyny izdestirýde, esirtki zattaryn anyqtaýda shekarashy sarbazdar qyzmettik ıisshil ıtterdiń kómegine júginedi.
Ári qaraı, shekara basqarmasynyń mańyzdy tapsyrmalaryn oryndaýmen aınalysatyn saıypqyrandary da alańdy «dúrbeleńge» toltyryp jiberdi. Qoıan-qoltyq urys, shekara buzýshyny ustaýdyń ádil-tásili – osynyń barlyǵy shekarashylardyń jaýyngerlik daıarlyqtary joǵary deńgeıde ekenin kórsetip tur.
Áserli kórinisterdi qyzyǵa tamashalaǵan at-ananyń birin sózge tartqan edik. Sóıtsek, ol ulty orys bolsa da qazaqshaǵa sýdaı Qyzylorda qalasynyń turǵyny eken. Uly Temir Aıtmannyń ómirindegi aıtýly sátke kýá bolý úshin kelgen Natalıa Grıgoreva: «Búgin men ulym úshin qatty qýanyp turmyn. Shekarashy atanyp, Otanyn qorǵaıtyn azamatqa aınalǵanyn kórýden asqan baqyt bar ma? Áskerge de ózi suranyp ketti. Jaqsy jerge túskenin kórip, kóńilim kóterildi. Ne aıtamyn, qulynym bergen antyna adal bolyp, týǵan elin qorǵasyn», dep analyq aq tilegin jetkizdi.
Osylaısha, shekaradaǵydaı «qas-qaǵym, qarbalaspen» ótken rásimniń sońy sarbazdardyń saptyq ánine ulasty. Budan keıin ata-analar sarbaz uldarymen qaýyshyp, ystyq saǵynyshtaryn basty...
