Halyqaralyq baıqaýlardyń júldegeri «Qazyna» bı ansambli «dala sarbazdary» jaýyngerlik bıin bıledi. Opera jáne balet teatrynyń solısteri týǵan jer Otan ana týraly án shyrqap kesh mazmunyn asha tústi. Mektep oqýshylarynan quralǵan hor álemde soǵys bolmasyn degen repertýarda án salyp kórermenniń ystyq yqylasyna bólendi.
Odan bólek elimizdiń estaradasynda ónerimen tanymal bop júrgen ártister de sahna kórkin qyzdyrdy. Olardyń arasynda ánshi Áıgerim Qalaýbaeva men patrıottyq ánderimen tanymal «Alashuly» toby jáne «Abyroı» ansambli óner kórsetti. Qala ákiminiń orynbasary Sársen Quranbek merekelik keshte sahna tórinen tabylyp, áskerı, quqyq qorǵaý salasynda ter tógip júrgen bir top azamatty qala ákiminiń Alǵys hatymen marapattady.
Solardyń qatarynda Shymkent qalasy boıynsha ekonomıkalyq tergep-tekserý departamentiniń asa mańyzdy ister jónindegi jedel ýákili Saparǵalı Baıbotaev ta bar.
«7 mamyr – Otan qorǵaýshylar kúnimen qalamyzdyń turǵyndary men qonaqtaryn shyn júrekten quttyqtaımyn. Aspanymyz ashyq, ómirimiz tynysh bolsyn. Otbasymyz aman bolsyn. Qala ákiminiń atynan Alǵys hat alyp otyrmyn. Bul da eńbektiń eskerilýi shyǵar. Sol úshin merekeni uıymdastarǵan barsha azamattarǵa shyn júrekten alǵys aıtamyn» dedi S.Baıbotaev.
Marapat ıesiniń quqyq qorǵaý salasyndaǵy eńbek ótili jıyrma jyldan asqan. Sonyń úsh jyly ekonomıkalyq qylmystardy tergep-tekserý qyzmetinde ótip jatyr. Mamannyń aıtýynsha bul qyzmettiń mindeti memleket qarjysyn talan-tarajǵa túsirmeý, ony qadaǵalaý. Ekonomıkalyq qylmystarmen kúres sonysymen qıyn ári jaýapkershiligi joǵary qyzmet bop sanalady.
Merekelik keshte «Qyzǵaldaq saraıynyń» kireberis zalynda qarý-jaraq kórmesi ótti. Ony uıymdastyrǵan Arnaıy maqsattaǵy operasııa qyzmeti. Ol 2022 jyly Qańtar oqıǵasynan keıin Prezıdent tapsyrmasymen qurylǵan bolatyn. Arnaıy jasaq jaýyngeriniń aıtýynsha kórmege Izraıl, Túrkııa, Amerıka Qurama Shtattarynyń ozyq úlgidegi ártúrli kalıbrdegi atys qarýlary qoıyldy. Olardyń arasynda máselen ızraıldik GLX granameti, túrkııalyq mr-5 shabýyldaýshy pıstolet-avtomaty, amerıkandyq Baret snaıper qarýy, sondaı-aq túngi-kúndizgi dáldeýshi qural AGOP-pen jabdyqtalǵan AK-74 avtomaty bar. Aıta ketý kerek arnaıy maqsattaǵy operasııa qyzmeti eldiń tynyshtyǵyn kúzetý, lańkestikpen kúres maqsatynda qurylǵan jasaq toby.
Qalalyq mádenıet tilderdi damytý jáne arhıvter basqarmasy basshysynyń orynbasary Móldir Ońdasynovanyń aıtýynsha 7 mamyr–Otan qorǵaýshylar kúnindegi is-sharalar 9 mamyr–Jeńistiń 80 jyldyǵy merekesi aıasynda uıymdastyrylǵan. Sala ókiliniń málimdeýinshe 80 jyldyq meıram qarsańynda Shymkentte kózi tiri 2 UOS ardageri men tyl ardagerleri marapattaldy. Sonymen birge mádenıet basqarmasy arnaıy konserttik baǵdarlama ázirlep, Astana alańynda merekelik dýmandy kesh ótkizýdi josparlap otyr. Konserttik is-sharada ońtústikten túlep ushqan elimizdiń tanymal estrada juldyzdary óner kórsetpek.
