Foto: Ashyq derekkóz
«Biz Jeńistiń 80 jyldyǵyn atap ótýge basa nazar aýdardyq. Elimiz boıynsha myńdaǵan mańyzdy, aýqymy keń is-shara ótkizilip jatyr. 500-ge jýyq kóshege Qazaqstan qaharmandarynyń esimi beriletin boldy», dedi Prezıdent.
Prezıdenttiń aıtýynsha, el aýmaǵynda «Batyrlarǵa taǵzym» atty jalpyhalyqtyq sherý uıymdastyrylady. Sherýge qatysýshylar Ekinshi dúnıejúzilik soǵysqa qatysqan ata-babalarynyń sýretterin ustap, kóshelermen júrip ótedi. Bul – tarıhı jadyny jańǵyrtý men jas urpaqqa beıbit ómirdiń qundylyǵyn uqtyrýdyń mańyzdy tásili.
Qasym-Jomart Toqaev qazirgi geosaıası ahýalǵa erekshe toqtalyp, beıbitshilik pen qaýipsizdikti saqtaý – Qazaqstannyń basty maqsaty ekenin atap ótti.
«Aqıqatty tanymaı, beıbitshiliktiń qadirin bilý múmkin emes. Soǵystyń tarıhı aqıqatyn, Uly Jeńistiń mán-maǵynasyn qasaqana burmalaýǵa jol berýge bolmaıdy», dedi Qasym-Jomart Toqaev.
Memleket basshysy eldiń syrtqy saıasaty ulttyq múddeni qorǵaýǵa baǵyttalǵanyn aıtyp, halqymyzdyń bolmysynan beıbitsúıgishtik pen ar-namys bıiktigi kórinetinin jetkizdi.
