Bul kúnderi aýa raıy kúrt qubylyp, jaýyn-shashyn jıileıdi, teriskeıden sýyq jel tolassyz soǵady. Kıiktiń analyǵy tolǵaǵy jetkende óńmeńnen óter osy qara sýyqqa qarsy júgire-júgire ábden áli bitkende ǵana baryp laqtaıdy eken. Kıik tóldep bolǵansha kıeli janýardy jyrtqyshtyń azýynan Tabıǵat-Ananyń ózi qorǵap, qamqorlyǵyna alady. El aýzynda dál osy kúnderi túz taǵysy qasqyr da ıis sezýden qalyp, tábetinen aıyrylady degen sóz bar.
9 mamyrda tańerteń Naýryzym aýdanyna qarasty О́leńdi aýylyndaǵy sharýa qojalyǵynyń basshysy Dmıtrıı Isaev óz alqabynyń shetinde qalǵyp ketken quralaıdyń basynan sıpaǵan sátin vıdeoǵa túsirip alǵan. Qazir atalǵan aýdanda kóktemgi egis jumystary júrip jatyr.
«Segizinshi mamyrda eshteńe kórinbep edi, toǵyzy kúni egistiktiń mańynda úıir-úıirimen órip júrgen kıikterdi baıqadyq. Túnde alqapty taptap tastapty. Endi tań quzynan turyp jerdi qorýǵa shyǵamyz, tún aýǵansha júremiz. Bıyl eki myń gektarǵa jýyq dán egemiz. Qaıdam, eńbegimiz esh ketpese boldy. Tóldep bolǵan soń bul mańnan aýyp ketýi de múmkin», deıdi sharýa.
Ádette óńirge quralaı salqyny mamyr aıynyń ishinde, birde aıdyń basynda, birde ortasynda, keıde aıaǵynda keledi. Mysaly, 2015 jyly kıeli janýarlar 24 mamyrdan bastap tóldeı bastaǵan. Soly jyly kıik qyryldy. Bıyl tóldiń basy 9 mamyrmen tuspas-tus kelip otyr.
Qostanaı oblysy
