Fotolar: TJM
Saltanatty ashylý rásimine Tótenshe jaǵdaılar mınıstri general-maıor Shyńǵys Árinov pen Atyraý oblysynyń ákiminiń orynbasary Qaırat Nurtaev qatysty.
TJ mınıstriniń aıtýynsha jańa depoda qutqarýshylardyń turmysy men jaraqtandyrylýy elordalyq bólimderden kem túspeıtin deńgeıde qamtamasyz etilgen. Bul tásil shaqyrýlarǵa tez den qoıýǵa múmkindik berip qana qoımaı, óńirlerge bilikti kadrlardy tartýǵa jáne olardyń sol jerde turaqty qyzmet atqarýyna septesedi.
«Mundaı jobalardyń jergilikti ákimdikterdiń belsendi qoldaýymen júzege asyrylyp jatqany erekshe mańyzdy – bul jergilikti jerlerde tótenshe jaǵdaılardyń profılaktıkasy men olarǵa daıyndyqtyń mańyzdylyǵyn túsinetinin kórsetedi. Búgingi jańalyq tásildiń ózgerip jatqanyn rastaıdy: biz jańa nysandardy salyp qana qoımaı, tıimdi jumys isteý úshin tolyqqandy jaǵdaı jasaımyz», dedi mınıstr.
Tótenshe jaǵdaılar mınıstrliginiń baspasóz qyzmetiniń málimdeýinshe zamanaýı modýldik ǵımarat jergilikti bıýdjet esebinen qysqa merzimde salynǵan ári táýlik boıy jumys isteýge qajetti barlyq zattarmen jabdyqtalǵan: dıspetcherlik bólme, oqý synyby, demalys bólmeleri, as úı. Kezekshi aýysymnyń qaramaǵynda – úsh mashına, onyń ishinde avtosısternalar men jedel den qoıý avtokóligi bar.
Dossor kentinde depo ashý aýyldyq jerlerde órtke qarsy ınfraqurylymdy damytý jónindegi memlekettik baǵdarlamanyń bóligi bolyp tabylady. Bıyl oblystyń birneshe aýdandarynda osyndaı nysandardy salý josparlanyp jatyr.
