Zardap shekken oqýshynyń anasynyń aıtýynsha, shabýylǵa keminde segiz jasóspirim qatysqan. Olardyń biri — quqyq qorǵaý organynyń qyzmetkeriniń uly.
«Ulymnyń denesi túgel kógergen, qan ketip jatyr, ol qatty psıhologııalyq kúızeliste. Balalardy «eger bul týraly bireýge aıtsańdar, taǵy da uramyz» dep qorqytqan. Men únsiz qala almaımyn. Ulym úshin qorqamyn, biraq ózgelerdiń balalary da zardap shegip kete me dep tipten qatty alańdaımyn», dedi jábirlenýshi balanyń anasy.
Otbasy oqıǵa boıynsha polısııaǵa aryz túsirgenimen, istiń ádil tergeletinine kúmánmen qarap otyr. Osyǵan baılanysty ata-analar Oqý-aǵartý mınıstrligi men quqyq qorǵaý organdarynan oqıǵany muqııat baqylaýǵa alýdy jáne istiń jabýly kúıde qalmaýyn talap etýde.
Atyraý oblystyq polısııa departamentine joldaǵan saýalymyzǵa berilgen jaýapta qazirgi ýaqytta kúdikti jasóspirimderdiń barlyǵy anyqtalyp, bólimshege jetkizilgeni aıtylǵan. Olardyń kámeletke tolmaǵandyǵyna baılanysty zańdy ókilderiniń qatysýymen jaýap alý josparlanǵan.
«Atalǵan derek boıynsha qylmystyq is tirkelip, jan-jaqty tergeý amaldary júrgizilip jatyr. Oqıǵanyń tolyq mán-jaıy anyqtalý ústinde. Tergeý múddesine sáıkes ózge aqparat jarııalaýǵa jatpaıdy. Quqyq buzýshylyq jasaǵan jasóspirimder ishki ister organdarynyń arnaıy esebine alynyp, materıaldar Kámeletke tolmaǵandar isi jónindegi komıssııaǵa joldanatyn bolady», dep jaýap berdi polısııa departamenti.
