2027 jylǵa deıin Qazaqstanda sý sharýashylyǵy ınfraqurylymyn damytý men jańǵyrtýdyń ekinshi kezeńi aıasynda aýqymdy jobalar júzege asyrylady. Josparlanǵan 25 jobanyń qatarynda jańa sý qoımalaryn salý, qoldanystaǵylaryn rekonstrýksııalaý jáne ırrıgasııalyq júıelerdi jańartý jumystary bar.
Atap aıtqanda, el aýmaǵynda 13 jańa sý qoımasy salynsa, 11 sý qoımasy qaıta jańǵyrtylady. Sonymen qatar Almaty, Atyraý, Abaı, Shyǵys Qazaqstan, Jambyl, Jetisý, Batys Qazaqstan, Qyzylorda, Pavlodar jáne Túrkistan oblystaryndaǵy uzyndyǵy 5000 shaqyrymnan astam ırrıgasııalyq kanal jańartylmaq.
Mınıstrliktiń málimetinshe, bul sharalar 200 myńnan astam halyq turatyn 134 aýyldyq eldi mekendi sý tasqyny qaýpinen qorǵaýǵa múmkindik beredi jáne eldegi sý ınfraqurylymynyń jalpy jaǵdaıyn edáýir jaqsartady.
Sý resýrstaryn basqarý salasyndaǵy taǵy bir basym baǵyt — halyqaralyq áriptestik. Sý sharýashylyǵy mınıstrligi sheteldik uıymdarmen jáne eldermen birlesip jalpy quny 12 mln AQSh dollarynan asatyn granttyq jobalardy iske asyrýda.
Mysaly:
-
Fransýz damý agenttiginiń (AFD) qoldaýymen Balqash kóliniń master-jospary ázirlenýde (1,35 mln eýro);
-
«Qazaqmys» korporasııasy Balqash ekojúıesin qorǵaýǵa 5 mln dollar baǵyttamaq;
-
Japonııa Úkimeti sý tasqynyna qarsy sharalarǵa 2 mln dollar kóleminde grant bólmek;
-
Islam damý banki 3,5 mln dollar kólemindegi tehnıkalyq kómek aıasynda zertteý, baǵalaý jáne jabdyqtaý jumystaryn júrgizbek.
Atalǵan qoldaýlar negizinde «Qazsýshar» kásiporny men Qazaq sý resýrstary ǵylymı-zertteý ınstıtýtynyń áleýeti kúsheıtilýde, al Aqparattyq-taldaý ortalyǵyna erte eskertý júıesi engiziledi.
2024 jylǵy 11 naýryzda Túrkistan oblysynyń Saryaǵash, Keles, Qazyǵurt, Jetisaı jáne Maqtaaral aýdandaryn aýyz sýmen qamtamasyz etý maqsatynda О́gem ózeninde GES kaskady bar toptyq sý qubyrynyń qurylysy bastaldy. Bul jobany «South Hydro Power» JShS iske asyrady. Jobanyń quny — 190 mlrd teńge, al iske asyrý barysynda 600-den astam jumys orny ashylmaq.
Jobada:
-
12 km týnnel tóseý,
-
40 km sý qubyry men tazartý stansııasyn salý,
-
5 shaǵyn GES-ten turatyn kaskad salý kózdelgen.
О́ndiristik qýaty jylyna 110 mln m³ aýyz sý jáne 72 MVt/saǵ elektr energııasyn óndirýge múmkindik beredi.
2024 jylǵy qyrkúıekte Mınıstrlik sý sharýashylyǵy salasynda halyqaralyq yntymaqtastyqty úılestirý maqsatynda Sý sektoryn damytý jónindegi seriktesterdiń úılestirý keńesin qurdy. Keńestiń quramynda 47 uıym bar, olardyń qatarynda:
-
Ulybrıtanııa, Fransııa, Shveısarııa, Izraıl, Nıderlandy, Vengrııa elshilikteri,
-
BUU Damý baǵdarlamasy,
-
Eýropalyq Odaq ókildigi,
-
«Qazaqmys» jáne basqa da iri ulttyq ári sheteldik kompanııalar.
Mınıstrlik qazirgi tańda Fransııa, Germanııa, Nıderlandy, Ispanııa, AQSh, Izraıl, Qytaı elderimen jáne halyqaralyq uıymdarmen 4 kelisim men 19 memorandýmǵa qol qoıǵan.
Saladaǵy jańǵyrý aıasynda 2024 jylǵy 1 aqpandaǵy Úkimet qaýlysyna sáıkes «Qazsýshar» kásiporny men «Nura toptyq sý qubyry» kásiporny biriktirildi. Qazirgi tańda kásiporynda basqarý júıesi ózgertilip, bıznes-prosester avtomattandyrylýda, sonymen qatar jańa baǵyttar engizilip jatyr.
Kompanııa endi sý sharýashylyǵy obektilerin kútip ustaý kezinde alynǵan qum men qıyrshyq tasty satý quqyǵyna ıe boldy. Bul qyzmetten jylyna shamamen 1 mlrd teńge tabys túsýi múmkin
2025 jyly qarjy lızıngi arqyly jalpy somasy 39 mlrd teńgege 757 arnaıy tehnıka men kólik quralyn satyp alý josparlanǵan. Búgingi tańda 303 tehnıka satyp alyndy.
Sonymen qatar, Q.Sátbaev atyndaǵy magıstraldy kanal jańǵyrtylyp jatyr. Bul baǵytta 83 mlrd teńge kóleminde qarjy qarastyrylǵan. 2028 jylǵa deıin 17 transformator satyp alý, 19 sorǵy agregatyn jóndeý jáne jańǵyrtý josparlanǵan.
