Qostanaıda jańa balabaqsha ashyldy

QOSTANAI. 03 tamyz. Qostanaıda «Bıznestiń jol kartasy--2020» baǵdarlamasy sheńberinde jańadan balabaqsha ashyldy. Bul jóninde alau.kz saıtyna silteme jasaǵan egemen.kz tilshisi habarlady. Kásipker Irına Sádýaqasova 2010 jyly óziniń bıznesin balalarǵa arnalǵan shaǵyn stýdııadan bastady. Ony balabaqsha etip úlkeıtý úshin ol «Damý» qorynan kómek surady, sóıtip «Bıznestiń jol kartasy-2020» baǵdarlamasynyń qatysýshysy bolyp shyǵa keldi. Balabaqshanyń jumysyn bastaǵanyna shamaly ýaqyt boldy. Qazir 100 oryndy ortalyq 70 balamen qamtylyp otyr. Balabaqsha meńgerýshisi Irına Sádýaqasova: «Biz Sberbankten sýbsıdııa jáne nesıege kepil aldyq. Sonymen ózimizdiń jeke menshik ǵımaratymyzdy alýdyń sáti tústi jáne taǵy da eki mamandy jumysqa qabyldadym. Qazir bizdiń balabaqsha ashyldy, onda kommersııalyq tobymyz da bar. Búldirshinderge barlyq jaǵdaı jasalǵan», – dedi. Balabaqsha qalalyq bilim bólimine «Balapan» baǵdarlamasy boıynsha respýblıkalyq bıýdjetten berilgen memlekettik tapsyrysqa suranys berdi. Eger ol qarjylandyrylsa, balabaqsha bıýdjettik baǵdarlama boıynsha búldirshinderdi qabyldaı bastaıdy. Kásipkerdiń nesıe alýǵa qarjysy jetpegende «Damý» qory oǵan 9 mıllıon teńge kepil berdi. Bul kómek qalada taǵy bir balabaqshanyń jumys isteýine múmkindik berdi. Al bul qalada bala baqsha kezegine turǵandar sanyn sál de bolsa qysqartýǵa sebep bolary sózsiz. Názıra Járimbetova. Derek, sýret: egemen.kz.