Jattyǵý barysynda jankeshtilikpen ter tógetin sańlaq taıaýda AQSh asyp, jahannyń kil myqty sportshylarymen birge oqý-jattyǵý jıynyn ótkizdi. Kolorado shtatyndaǵy Denver qalasynda ornalasqan Olımpıadalyq bazada uıymdastyrylǵan oqý-jattyǵý jıynynda klassıkalyq kúres sheberlerimen tájirıbe almasqan oǵlan halyqaralyq oqý-jattyǵý jıynynyń paıdasy zor bolǵanyna senimdi.
«Úsh aptaǵa sozylǵan jıyn barysynda eki kezeńde shama-sharqymyzdy baıqap kórdik. Munda tórtkúl dúnıeniń júzden astam myqtysy fızıkalyq daıyndyǵyn pysyqtap, óz múmkindigin zerdeledi. Tájirıbe almasýǵa kelgen saıypqyrandardyń qatarynda sary qurlyq pen kári qurlyqtyń kil myqtylary, Olımpıada, álem chempıondary da boldy. Olarmen birge jattyǵýdyń jóni bólek», deıdi ol.
Estý qabileti zaqymdanǵan sportshylar arasynda baıraqty básekelerde el namysyn abyroımen qorǵap júrgen Nurjan shartaraptyń kil myqtylary bas qosqan jıynda kásibı sheberligin shyńdap qana qoımaı, ózine qajetti dúnıelerdi kókeıge túıgenine talas joq.
«Myqtylarmen jattyqqan saıyn sheberligiń shyńdala túsedi. Oqý-jattyǵý jıynyn uıymdastyrǵan azamattarǵa, bapkerlerge alǵystan basqa aıtarym joq. Basty maqsatymyz – iri jarystarda atoı salyp, senim artyp otyrǵan barsha qaýymdy, jankúıerlerdi qýantý. Qoldan kelgenshe kók baıraqty bıikte jelbiretýge kúsh salamyz», deıdi sportshy.
Nurjan Brazılııadaǵy sýrdlımpııalyq oıyndardan bólek, 2023 jyly Bishkekte ótken álem chempıonatynda top jarǵan. Sonymen qatar Azııa oıyndarynda da jeńistiń bıik tuǵyrynan kórinip, birneshe halyqaralyq týrnırde júldeger atanǵan. Aldaǵy ýaqytta Sýrdlımpıada oıyndarynda top jarýǵa nıetti.
Jambyl oblysy
