Foto: Ekologııa jáne tabıǵı resýrstar mınıstrligi
Ekologııa jáne tabıǵı resýrstar mınıstrliginiń málimetinshe, 2009 jyly qurylǵan «Technic Destroy» kompanııasy búginde keńselik jáne kommersııalyq tehnıkany, sondaı-aq lıtıı-ıondy batareıalardy qaıta óńdeý baǵytynda elimizdegi jetekshi kásiporynǵa aınaldy. Kompanııa Ortalyq Azııada lıtıı-ıondy batareıalardy óńdeıtin arnaıy óndiris jelisin engizgen alǵashqy uıym retinde tanymal.
Aıta keteıik, 2024 jyldyń ózinde kásiporyn 3000 tonnadan astam batareıa men elektrondy jabdyqtardy qaıta óńdep, Qazaqstandaǵy ekologııalyq ahýaldyń jaqsarýyna eleýli úles qosqan.
Jobanyń aıasynda engizilgen lıtıı-ıondy batareıalardy óńdeý jelisiniń jobalyq qýattylyǵy saǵatyna 300 kg, al jyldyq óńdeý kólemi 500 tonnadan asady.
«Jasyl damý» AQ tarapynan kórsetiletin qoldaý — óńdeýdiń zamanaýı ári ekologııalyq qaýipsiz ádisterin engizýge baǵyttalǵan. Bul bastama Qazaqstannyń qorshaǵan ortany qorǵaý jáne tabıǵı resýrstardy utymdy paıdalaný saıasatyna saı keledi.
Atalǵan yntymaqtastyq elektrondy qaldyqtardy basqarý salasyndaǵy úzdik tájirıbelerdi engizýge, jergilikti ekojúıelerdi qorǵaýǵa jáne Qazaqstannyń ekologııalyq turaqtylyǵyn nyǵaıtýǵa yqpal etedi.
