Baqyt qalaı esepteledi?
Reıtıng alty negizgi faktor negizinde qurastyrylady:
− jan basyna shaqqandaǵy ishki jalpy ónim (JIО́),
− ómir súrý uzaqtyǵy,
− áleýmettik qoldaý,
− tańdaý erkindigi,
− jomarttyq deńgeıi,
− sybaılas jemqorlyq deńgeıi.
Árbir turǵyn óz ómirin 0-den 10-ǵa deıingi shkala boıynsha baǵalaıdy. Qorytyndy nátıje – sońǵy úsh jyldyń (2022-2024) ortasha kórsetkishi.
Kósh basynda kimder tur?
Fınlıandııa segizinshi jyl qatarynan birinshi oryndy ıelenip keledi. Odan keıin Islandııa men Danııa ornalasqan. Al alǵashqy bestikke kútpegen jerden Kosta-Rıka (4-oryn) endi. Bul el Shvesııa, Norvegııa jáne Nıderlandyny basyp ozdy.
Zertteýshilerdiń aıtýynsha, Latyn Amerıkasy elderi ekonomıkalyq kórsetkishterine qaramastan ómir sapasyn joǵary baǵalaıdy. Bul qubylys ǵylymda «latynamerıkalyq baqyt paradoksy» dep atalady.
Izraıl jalǵasyp jatqan qaqtyǵysqa qaramastan 8-orynda tur. Al reıtıngtiń sońǵy, 147-ornynda Aýǵanstan ornalasqan.
Qazaqstannyń ereksheligi nede?
Qazaqstan senim men ózara kómek kórsetý kórsetkishteri boıynsha joǵary nátıjege qol jetkizdi. Bıylǵy esepte osy faktorlarǵa erekshe mán berilgen.
Elimiz:
− joǵalǵan ámııandy kórshige qaıtarý yqtımaldyǵy boıynsha – 30-orynda,
− beıtanys adamǵa qaıtarý boıynsha – 42-orynda.
Aıta keterligi, Fransııa men Sıngapýr IJО́ deńgeıi joǵary bolǵanyna qaramastan, bul kórsetkishter boıynsha Qazaqstannan tómen nátıje kórsetti.
Buǵan deıin Qazaqstan satyp alý qabiletiniń parıteti boıynsha álemdegi eń iri 40 ekonomıkanyń qataryna engeni habarlanǵan edi.
