Búgingi tańda «Jumysshy mamandyqtar jyly» aıasynda qaladaǵy joǵary synyp oqýshylaryna óndiris oryndaryn tanystyrý maqsatynda keń kólemdi is-sharalar uıymdastyryla bastady.
Máselen jýyrda Shymkent qalalyq kásipkerler palatasynyń qyzmetkerleri, «Top Generation School» bilim berý ortalyǵynyń shákirtteri shahardaǵy shulyq óndiretin eń iri kásiporynnyń biri «Álem-BT» fabrıkasynda boldy. Uıymdastyrýshylardyń aıtýynsha osy is-shara arqyly bolashaq túlekterdi jumysshy mamandyq ıelerimen tanystyryp, jan-jaqty málimet berý kózdelgen eken.
«Shymkent qalasynda 40-qa jýyq kolledj bolsa, sonyń 25-inde dýaldy oqytý júıesi bar. Sol arqyly 10 myńǵa jýyq stýdent ózderiniń teorııalyq bilimin kásiporyndarǵa baryp, tájirıbemen ushtastyrýǵa múmkindik alǵan. Sonyń nátıjesinde jastar óz mamandyǵyn tereń meńgerip, bilikti maman bolyp shyǵýǵa daıarlanady. Jalpy kásipkerler palatasy qalamyzdaǵy bilim berý uıymdarymen birlesip sapaly kadr daıyndaý isin ári qaraı jalǵastyra beredi. Bul birinshi kezekte mamandarǵa suranysty azaıtý úshin jáne ekonomıkany turaqty baǵytta damytý úshin kerek» dedi Shymkent qalasy kásipkerler palatasynyń bólim basshysy Janar Altaeva.
Aıta keteıik, «Atameken» Ulttyq kásipkerler palatasy 2014 jyldan bastap jyl saıyn óńirdegi kásiporyndarǵa qandaı maman qajettigine monıtorıng jasaıdy. Bul baqylaý Qazaqstannyń Eńbek jáne halyqty áleýmettik qorǵaý mınıstrliginiń enbek.kz platformasynda júzege asyrylady. Ol eńbek naryǵynyń qajettiligin naqty anyqtaýǵa, tehnıkalyq jáne kásibı oqytý boıynsha memlekettik tapsyrysty qalyptastyrýǵa kómektesedi. Nátıjesinde bilim berý uıymdary men oqý ortalyqtary ózderiniń oqytý baǵdarlamalaryn kásiporyndardyń suranysyna saı beıimdep, maman daıyndaýdyń sapasyn arttyra túsedi.
ShYMKENT
