Sýret: gov.kz
Búginde elimizde volonterlik qyzmet qarqyndy damyp, túrli salany qamtyp otyr. Mádenıet jáne aqparat mınıstrligi bergen derekke súıensek, respýblıkada 755 volonterlik uıym tirkelgen. Al eriktilikpen aınalysatyn otandastarymyzdyń jalpy sany 280 myńǵa jýyqtaıdy.
Bizdegi volonterlik qyzmettiń basty baǵyttaryna – qarttar men jalǵyzbasty jandarǵa kómek kórsetý, ómirlik qıyn jaǵdaıdaǵy azamattardy qoldaý, ekologııalyq volonterlik pen tótenshe jaǵdaılardyń zardaptaryn joıýǵa qatysý jatady.
Sondaı-aq elimiz halyqaralyq deńgeıde de volonterlik qaýymdastyqtar arasyndaǵy tabysty ınstıtýsıonaldyq áriptestiktiń úlgisin kórsetip keledi. Volonterlik qyzmettiń quqyqtyq bazasy da tolyq qalyptasqan. Máselen, «Volonterlik qyzmet týraly» zań qoldanysta, al 2026 jylǵa deıingi volonterlikti damytý jónindegi Jol kartasy kezeń-kezeńimen júzege asyrylyp jatyr.
Eske salsaq, Memleket basshysy Qasym-Jomart Toqaevtyń bastamasymen BUU Bas Assambleıasy 2026 jyldy Turaqty damý maqsattaryndaǵy «Halyqaralyq volonterler jyly» dep jarııalaǵan edi. Osyǵan sáıkes jıyn barysynda volonterlik qozǵalysty damytý, azamattyq belsendilikti arttyrýǵa baǵyttalǵan negizgi baǵyttar, bastamalar men josparlanǵan is-sharalar sóz boldy.
Kezdesýge belsendi jastar, memlekettik organdardyń qyzmetkerleri de qatysyp, olarǵa respýblıka kóleminde volonterlik qyzmetti úılestirý maqsatynda ashylǵan «Qazvolunteer.kz» onlaın platformasy tanystyryldy.
Aıta ketsek, platforma volonterler men uıymdardy biriktirip, júzege asyrylyp jatqan jobalar men qatysý múmkindikteri jóninde aqparat usynady. Budan bólek, elimiz boıynsha volonterlik bastamalardy qoldaý men monıtorıng júrgizýdi qamtamasyz etetin Ulttyq front-ofıs qyzmet atqarady.
