Mamyr aıynan bastap elimizdiń arnaıy halyqqa qyzmet kórsetý ortalyqtaryna kelýshilerdi sýretke túsirý rásimin engizý bastaldy. Bul shara qaýipsizdikti kúsheıtýge jáne memlekettik qyzmetterdi alý kezinde alaıaqtyqtyń aldyn alýǵa baǵyttalǵan. Buǵan deıin mamandandyrylǵan HQKO-larda tulǵany sáıkestendirýdi qyzmet alýshy usynǵan qujat negizinde qyzmetker júrgizetin. Endi rásimdeý barysynda azamattyń túri sýretke túsiriledi, odan keıin ony júıe avtomatty túrde jeke tulǵalardyń memlekettik derekter bazasynda saqtalǵan sýretpen salystyrady. Bul qyzmet kórsetý barysynda jalǵan sýretti nemese telefon ekranyndaǵy fotosýretti qoldanýdy boldyrmaıdy. Eger azamat bıometrııalyq sáıkestendirýden óte almasa, júıe qyzmet kórsetý múmkindigin buǵattaıdy.
«Biz memlekettik qyzmet alý júıesindegi ashyqtyqty tek ishinara etetin adamı faktordy joıdyq. Bıometrııalyq sáıkestendirý zań buzýshylyqty azaıtyp, mamandandyrylǵan HQKO-larda sybaılas jemqorlyq táýekelderin joıýǵa tikeleı jol ashady. Bul zamanýı tehnologııa memlekettik qyzmet kórsetý júıesin tolyǵymen zańdy ári ashyq etýge jasalǵan taǵy bir qadam», dedi memlekettik korporasııanyń basqarma tóraǵasy Arman Kenjeǵalıev.
Eske sala ketsek, búginde memlekettik qyzmetterdi HQKO-lardan bólek elektrondyq úkimet portaly, sonymen qatar HQKO mobıldi qosymshasy men ekinshi deńgeıli bankterdiń qosymshalary arqyly da alýǵa bolady.
