Foto: Nýrlan Baıgazıev/Facebook
Aldyn ala málimet boıynsha, oqıǵa 13 mamyr kúni keshke qalanyń bir dámhanasynda bolǵan. Depýtatty soqqyǵa jyqqannan keıin ol bet jaraqatymen aýrýhanaǵa jetkizildi. Alaıda Jambyl oblystyq polısııa departamentiniń málimetinshe, ol aýrýhanaǵa jatýdan bas tartqan.
«Bul fakti boıynsha QR Qylmystyq kodeksiniń 293-baby 1-bóligi «Buzaqylyq» boıynsha sotqa deıingi tergeý júrgizilip jatyr. Oqıǵaǵa qatysy bar adam anyqtalyp, polısııaǵa jetkizildi. Qazirgi ýaqytta qylmystyq is boıynsha oqıǵanyń barlyq mán-jaıyn jan-jaqty anyqtalyp jatyr, qajetti tergeý jáne jedel-izdestirý sharalary júrgizilýde», dep habarlady quqyq qorǵaý organdary.
Áleýmettik jelilerde taraǵan aqparatqa sáıkes, Nurlan Baıǵazıev Taraz qalasyna issaparmen kelgen. Zańger retinde ol klıenttermen kezdesý ótkizip jatqan. Sol sátte oǵan shabýyl jasalǵany habarlanǵan. Aldyn ala málimet boıynsha, er adam depýtatty kastetpen urǵan.
Aıta keteıik, 28 sáýirde Nurlan Baıǵazıev Almaty oblysynda kámeletke tolmaǵandar isi jónindegi polısııa qyzmetkerleriniń 17 jastaǵy qyzdy toqtatyp, ony qyzmettik kólikpen qydyrtyp qaıtýǵa usynys jasaǵan sátin vıdeoǵa túsirip alǵan bolatyn. Vıdeoda ol polısııa qyzmetkerleriniń tarapynan bolǵan zańbuzýshylyqtarǵa nazar aýdardy. Qyzmettik tekserýden keıin kináli polıseıler jumystan shyǵaryldy.
