QR Densaýlyq saqtaý mınıstrliginiń qoldaýymen Kardıologııa jáne ishki aýrýlar ǵylymızertteý ınstıtýty jáne Qazaq ǵylymı qoǵamy uıymdastyrǵan forýmǵa elimizdiń barlyq óńirleri men Reseı, Belgııa, Izraıl elderinen 300-den astam gastroenterolog, koloproktolog, terapevt, morfolog, ınfeksıonıst, endoskopıst mamandary men fýnksıonaldyq dıagnostıka dárigerleri jınaldy.
Atalǵan forým jyl saıyn 19 mamyrda – Dúnıejúzilik ishektiń qabynýy aýrýlary kúni qarsańynda uıymdastyrylyp, Kron aýrýy men oıyq jaraly kolıt týraly habardarlyqty arttyrýdy kózdeıdi.
Mamandardyń málimetine súıensek, sońǵy jyldary Qazaqstanda ishek qabynýy aýrýlaryna shaldyqqan naýqastar sany kóbeıe bastaǵan. 2018 jyldan 2023 jylǵa deıin Kron aýrýy 555-ten 1631-ge deıin, al oıyq jaraly kolıt aýrýy 2218-den 7305-ke deıin ósken. 2024 jyldyń statıstıkasy ár 100 myń adamǵa shaqqanda 5-10 naýqasta IQA keseli tabylatynyn jáne bul san artýy múmkin aıǵaqtaıdy. Bul bir jaǵynan dıagnostıkanyń durystalýy jáne oǵan qosa shyn máninde bul derttiń beleń alyp otyrǵandyǵyn baıqatady. Ishek qabynýy aýrýlaryna men orta jastaǵylarǵa qosa jasóspirimder de jıi dýshar bolyp jatqany da alańdatady. Mundaı dıagnoz qoıylǵandardyń ortasha jasy – 35-40 jas aralyǵyndaǵylar. IQA keseline kóbinese ýrbanızasııa, kúızelis, juqpaly aýrýlar men antıbıotıkterdi óz betinshe qabyldaý sııaqty jaǵdaılar jeteleıdi.
«Bizdiń Kardıologııa jáne ishki aýrýlar ǵylymı-zertteý ınstıtýtynda elimizdegi alǵashqy, zamanaýı dıagnostıkalyq bazamen jabdyqtalǵan ári bilikti mamandardyń mýltıdıssıplınarlyq toby jumys isteıtin IQA, qysqa ishek sındromyn emdeý jáne nýtrıtıvtik túzetý mamandandyrylǵan ortalyq ashyldy. Jańa ortalyqtyń mindeti – IQA men QIS bar naýqastardyń densaýlyǵyn durystap, dertin asqyndyrmaý. Ortalyqtyń esigi kásibı kómekke muqtaj jandarǵa ashyq», - deıdi Basqarma tóraǵasy Marat Pashımov.
Forýmǵa qatysýshylar der kezinde dıagnostıkalaýdyń qajettiligin, joǵary tehnologııalyq zertteý ádisteri men bıologııalyq terapııanyń qoljetimdiligin, sondaı-aq IQA emdeýdegi kópsalaly tásildiń mańyzdylyǵyna toqtaldy. Mamandar áli de sheshimin tappaǵan máseleler qatarynda birqatar óńirlerde endoskopııalyq dıagnostıkaǵa qoljetimdilik shekteýli, pasıentterge psıhologııalyq qoldaý jetispeýshiligi bar ekendigin atady.
Sonymen qatar Ulttyq forým aıasynda jas ǵalymdardyń baıqaýy ótti.
Forým barysynda elimizde mamandandyrylǵan ortalyqtar jelisin keńeıtip, pánaralyq birlesken jumysty kúsheıtý, halyqaralyq tájirıbege negizdelgen klınıkalyq usynymdardy engizý men dárigerler úshin turaqty kásibı bilim berý baǵdarlamalaryn damytý qajettigi talqylandy.
ALMATY
