Kóktem kelgeli kókten nár tambaǵan Naýyrzym aýdanynyń sharýa qojalyqtary da topyraq ylǵalyn joǵaltpaı turǵanda tuqym seýip úlgerýge asyq. Atalǵan aýdanǵa qarasty О́leńdi aýylyndaǵy «Bogdan» sharýa qojalyǵy bıyl 2 myń gektar alqapqa dán sińirýdi josparlap otyr. Shaǵyn sharýashylyq búginge deıin 1 myń gektar jerge tuqym seýip úlgergen.
Meńdiqara aýdanyndaǵy Serik Muqanov basqaratyn sharýashylyq ta alqaptyń shetine tehnıkasyn ıirip qoıyp, kóktemgi naýqanǵa saqadaı-saı otyr. Sharýashylyq óz ıeligindegi 6,5 myń gektar egistik jerdiń ylǵalyn jaýyp tuqymyn qamdap qoıǵan.
«Bıyl endi qar az boldy. Sonyń ózinde bir metrden artyq ylǵal bar. Osy jetkilikti dep oılaımyn. Endi ekkennen keıin kóre jatarmyz. Jańbyrǵa qaraımyz, kóremiz. Áli de jańbyr kerek. Jańbyr artyq bolmaıdy. Biz jaqta kóktemgi egis jumystary topyraq temperatýrasy tún mezgilinde +13-14 gradýsqa jetkende bastalady. Naýqanǵa daıynbyz», deıdi sharýashylyq agronomy Aslan Abdýllın.
Atalǵan sharýashylyq bıyl maıly daqyl alqabyn 10 myń gektarǵa jetkizgen. Bıdaı, burshaq daqyldarynyń kólemi, kerisinshe, jyl sanap kemip barady.
«Biz birtindep alqapty ártaraptandyryp, naryqqa beıimdelip kelemiz. Qazir bıdaı arzan, suranys tómen. Al maıly daqyldyń baǵasy qashanda turaqty, suranys ta bar. Kóktemgi naýqanǵa memleket jylda qarjylaı kómek kórsetip keledi. Biraq bıyl sýbsıdııany kishkene keshigińkirep berdi. Taıaýda 5 paıyz jyldyq ósimmen nesıe de aldyq. Tuqym qory jetkilikti. Bıyl Reseıden, Qyzyljar óńirinen jańa tuqym satyp aldyq. Jaǵdaıymyz jaman emes, jumys oıdaǵydaı júrip jatyr», deıdi Serik Muqanov.
Oblystyq aýyl sharýashylyǵy basqarmasynyń bas mamany Kenje Jumandyqovtyń aıtýynsha, óńir sharýashylyqtary kóktemgi egis naýqany qarsańynda tuqymmen de, janar-jaǵarmaımen de tolyq qamtamasyz etilgen. Qazir qoımada 514,2 myń tonna tuqym bar. Kóktemgi dala jumystaryna 72,8 myń tonna dızel otyny bólingen. Aýyl sharýashylyǵy taýaryn óndirýshilerge janarmaıdyń lıtri
254 teńgeden berilip jatyr.
Munyń syrtynda, sharýalarǵa Agrarlyq nesıe korporasııasy arqyly «Keń dala» jəne «Keń dala 2» baǵdarlamalary boıynsha 84,1 mlrd teńge, al Azyq-túlik kelisimshart korporasııasy arqyly forvardtyq satyp alý tetigimen 7 mlrd 350 mln teńge bólingen.
Bıyl kóktemgi egis naýqanyna 19,2 myń traktor, 22,2 myń tuqymsepkish, 1,3 myń zamanaýı dánsepkish keshen qatysatyn bolady. Salaǵa jaýapty basqarmanyń dereginshe, búginge deıin oblys boıynsha 100 myń gektardan astam alqapqa egin egilgen. Aldaǵy ýaqytta kún raıy kúrt qubylyp ketpese, óńir sharýashylyqtary kóktemgi naýqandy mamyr aıynyń sońyna deıin aıaqtaıdy.
Qostanaı oblysy
