Is-sharaǵa Oqý-aǵartý mınıstri Ǵanı Beısembaev, UǴA akademıkteri, jetekshi jas ǵalymdar, sondaı-aq elimiz óńirlerinen kelgen 400-den astam respýblıkalyq jáne halyqaralyq konkýrstardyń jeńimpazdary men júldegerleri, ǵylymı jetekshileri qatysty.
Jas zertteýshilerdiń ǵylymǵa attaǵan qadamyna sát-sapar tilep, ǵylymı qaýymdastyqtyń árdaıym qoldaý kórsetýge ázir ekenin atap ótken Prezıdent janyndaǵy UǴA Prezıdenti A.Kúrishbaev Oqý-aǵartý mınıstrligimen birlesip ótkizip otyrǵan forýmnyń mańyzyn atap ótti. Memleket basshysy Qasym-Jomart Toqaevtyń ǵylym men ınnovasııany damytý máselesine aıryqsha kóńil bólip otyrǵanyn jetkizip, Prezıdent tapsyrmasymen ǵylym júıesin reformalaý boıynsha keshendi sharalardyń iske asyp jatqanyn, sonyń negizinde ǵylymdy elimizdegi memlekettik jáne qoǵamdyq damýdyń basty qozǵaýshy kúshine aınaldyrý jumystary qarqyn alǵanyn atap ótti.
– Búgingi shara osy reformalardyń mańyzdy quramdas bóligi ǵana emes, sonymen qatar aǵa býyn ókilderiniń otandyq ǵylymnyń bolashaǵyna degen qamqorlyǵynyń shynaıy kórinisi. Sizderdi bolashaqta halqymyzdyń birtýar uly ǵalymdary – Shoqan Ýálıhanov, Qanysh Sátpaev, Álkeı Marǵulan syndy qaıratkerlerdiń izgilikti isin jalǵastyratyn, álemge tanymal ǵalymdar qatarynan kórgimiz keledi. Jas talanttar – otandyq ǵylymnyń bolashaǵy! Halqymyzda «Asyl – tastan, aqyl – jastan» degen dana sóz bar. Ǵylymnyń bolashaǵy – jastardyń qolynda. Olaı bolsa, qabiletti jas talanttardy taýyp, olardy zaman talabyna saı tárbıelep, bilim deńgeıin shyńdaý – bizdiń qasıetti mindetimiz bolmaq. Jas talanttardy qoldaýdaǵy Ulttyq ǵylym akademııasynyń alǵashqy qadamy – byltyr, táýelsizdik jyldarynda tuńǵysh ret Ulttyq ǵylym akademııasy janynan Jas ǵalymdar keńesiniń qurylýymen baılanysty. Kelesi jasaǵan mańyzdy qadam – mektep qabyrǵasynan bastap jas daryndardy ǵylymǵa tartý. Forým – jaı ǵana birjolǵy basqosý nemese sán úshin jasalǵan shara emes, bul – ǵylym salasyn kreatıvti oılaıtyn, qabiletti jastarmen tolyqtyrýǵa baǵyttalǵan uzaq merzimdi strategııa, – dep atap ótti UǴA prezıdenti.
Forým aıasynda UǴA janynan Jas zertteýshiler akademııasy qurylyp, onyń qurylymy men jumys organdary jasaqtaldy.
Ǵylymǵa qyzyqqan oqýshylardyń barlyǵyn qoldaý kerektigin alǵa tartqan UǴA vıse-prezıdenti, akademık Asqar Jumadildaev:
– Jobalarmen tanysqanda oqýshylardyń ǵylymǵa degen yntasynyń joǵary ekenin baıqap otyrmyz. Forýmǵa óz aımaǵynda belgili dárejede jetistik kórsetip, ǵylymı zertteýlerdiń ozyq úlgisin kórsete bilgen oqýshylar jınaldy. Jasaǵan jobalary, ázirlemelerine qarap, jas zertteýshilerge qoldaý qajet ekenin kórip otyrmyz. Ulttyq ǵylym akademııasy ǵylymdy balalar men jastar arasynda nasıhattaýdy kúsheıte otyryp, osy forým úlgisindegi jobalardy aldaǵy ýaqytta da jalǵasytyra beretin bolady. Kórip otyrǵanymyzdaı, oqýshylardyń ynta-jigeri búginde adamzatqa paıdaly, jahandyq másele týyndatyp otyrǵan taqyryptarǵa aýyp, naqty bir salada nátıjeli joba ázirler shyǵýǵa barynsha tyrysqan. Bul jerde ǵylymı jetekshilerdiń de qoldaýy erekshe. Endigi kezekte ǵylymǵa turaqty qoldaý jobalaryn jalǵastyra berýimiz qajet, – dep atap ótti akademık.
Forým oqýshylardyń ǵylymı-zertteý jobalary men ázirlemelerin tanystyrýǵa arnalǵan alańǵa aınalady. Kórmege usynylǵan jobalardyń qaı-qaısysyn alsaq ta, izdenis pen tabandylyqtan turady. Jobalardyń biri ǵaryshpen baılanysty bolsa, endi biri ekologııany jaqsartýǵa baǵyttalǵan. Tabıǵı ónimdilik pen taza sýdy tıimdi paıdalaný, qoqystardy kádege jaratý da osy zertteýlerge arqaý bolyp otyr. Munda oqýshylardyń daıyndyq deńgeıi baǵalanyp, jetekshi ǵalymdar men sarapshylar tarapynan pikirler aıtylyp, úzdik jas zertteýshiler marapattaldy.
Úzdik ǵylymı ázirleme atalymy boıynsha:
1 dárejeli dıplommen «Bıonıkalyq protez jáne ekzoskelet» jobasy úshin Almazuly Aıbat, Hasen Sultan, 2 dárejeli dıplommen «KazZAI» ǵarysh tik ushaǵynyń jerge paıdasy» jobasy úshin Jorabek Zaınab, 3 dárejeli dıplommen «Joǵary dáldiktegi, órttiń aldyn alatyn robot-mashına» jobasy úshin Raımjan Alımjan marapattaldy.
Úzdik baıandamasy úshin:
1 dárejeli dıplommen Almaty qalasy, №178 mamandandyrylǵan lıseıdiń 10 synyp oqýshylary Qajykeldi Jumabek, Eraly Amanjol, 2 dárejeli dıplommen Almaty qalasy, Y.Altynsarın atyndaǵy №159 gımnazııasynyń 10-synyp oqýshysy Danııal Murat, Almaty qalasy, №165 mamandandyrylǵan lıseıdiń 9-synyp oqýshysy Arýjan Aıdarhanova, 3 dárejeli dıplommen Aqtóbe oblysynan 11-synyp oqýshysy Jansaıa Naǵashybaeva, Qostanaı qalasy № 1 mektep-lıseıiniń 10 synyp oqýshysy Nıkıta Belashov, Astana qalasy, Sultanbek Qojanov atyndaǵy №64 mektep-lıseıiniń 10 d synyp oqýshysy Azat Jumash marapattaldy.
«Zııatker» bilim báıgesi boıynsha №52 jalpy bilim beretin mekteptiń, Shoqan Ýálıhanov atyndaǵy №12 mamandyrylǵan gımnazııasynyń oqýshylary marapattaldy.
Oqýshylar forým aıasynda akademık Q.I. Sátbaev, arheologııa jáne Qazaqstan ǵylymy tarıhy mýzeılerine ekskýrsııa jasap, jetekshi jas ǵalymdar men akademıkterdiń baıandamalaryn tyńdap, sheberlik saǵattaryna qatysty. Forým qatysýshylaryna «Qoja – jańa saıahat fılmi kórsetildi.
ALMATY
