"Ekonomıkalyq zertteýler ınstıtýty" AQ Makroekonomıkalyq zertteýler jáne boljaý ortalyǵynyń aǵa sarapshysy Ramazan Esengazıev bul ósim ekonomıkanyń negizgi sektorlaryndaǵy turaqty jáne oń serpindi kórsetetinin atap ótti.
«Jalpy aıtqanda, JIО́ ósimi ónerkásiptik óndiristiń de, qyzmet kórsetý salasynyń da teńgerimdi damýymen baılanysty, olar sáıkesinshe shamamen 7,5% jáne 5,3% ósti. Sonymen qatar, ınvestısııalardy da erekshe atap ótken jón — olardyń negizgi kapıtalǵa shaqqandaǵy kólemi 13,7%-ǵa, bul rette, óńdeý ónerkásibinde áserli 34,3%-ǵa ósti. Munyń bári búgingi tańda ekonomıkanyń ósý sıpaty shynymen de sapaly ekenin kórsetedi», — dep túsindirdi sarapshy.
Ol sondaı-aq ónerkásip salalary, onyń ishinde taý-ken jáne óńdeý, qurylys, saýda jáne kólik salalary ekonomıkanyń ósýine úlken úles qosatynyn atap ótti. «Mysaly, Kólik jáne qoımalaý 22,4%-ǵa, qurylys 16,2%-ǵa, óńdeý ónerkásibi 7,2%-ǵa, taý-ken óndirý 7,1%-ǵa, sonyń ishinde munaı óndirý 8,8%-ǵa ulǵaıdy. Saýda-sattyqqa keletin bolsaq, kólem shamamen 7%-ǵa ósti», — dep málimdedi Ramazan Esengazıev.
Statıstıka derekteri ónerkásiptik óndiristiń osy oń dınamıkasyn rastaıdy. О́nimniń jalpy ónimi 6,6%-ǵa ósti, bul rette, mashına jasaý 11,2%, tamaq ónimderin óndirý 12%, munaı óńdeý 13,7%, hımııa ónerkásibi 11,2%, metall buıymdaryn óndirý 21,6%, qurylys materıaldaryn óndirý 12,9% qosty. Sondaı-aq kómir óndirýdiń 11,2%-ǵa ósýi baıqaldy. Qurylys jumystarynyń kólemi 16,2%-ǵa ulǵaıdy.
Ol tamaq ónimderin óndirýdiń, mashına jasaýdyń, jabdyqtardy jóndeý men ornatýdyń ósýi arqyly qamtamasyz etiletin óńdeý ónerkásibiniń damýyn erekshe atap ótti. «Munda oń dınamıka ishki jáne syrtqy suranystyń ósýine, taý-ken kompanııalary tarapynan shıkizattyń turaqty jetkizilýine, sondaı-aq qurylys materıaldary men komponentteriniń edáýir kólemin qajet etetin kóptegen ınvestısııalyq jobalardy iske asyrýǵa baılanysty bolýy múmkin», - dep túsindirdi Ramazan Esengazıev.
Sonymen qatar, 2025 jylǵy qańtar–sáýirde Qazaqstanda shamamen 4,9 mln sharshy metr turǵyn úı paıdalanýǵa berildi, bul ótken jyldyń sáıkes kezeńiniń kórsetkishinen 6,8%-ǵa artyq. Sondaı-aq, kólik qyzmetteriniń kólemi 22,4%-ǵa edáýir ósti, buǵan, eń aldymen, temirjol jáne qubyr kóligimen júk tasymalynyń ósýi yqpal etti.
Investısııalyq belsendiliktiń ósýi - ekonomıkany qoldaýdyń taǵy bir mańyzdy faktory. 2025 jyldyń alǵashqy tórt aıynda negizgi kapıtalǵa salynǵan ınvestısııalardyń naqty kólemi, 2024 jyldyń sáıkes kezeńimen salystyrǵanda, 13,7%-ǵa ósti.
Ol ınvestısııalyq belsendiliktiń negizgi draıverleri — "Jaıly mektep" ulttyq jobasy jáne "Investısııa ornyna tarıf" memlekettik baǵdarlamasyn iske asyrý ekenin atap ótti. «Osy bastamalar aıasynda búkil el boıynsha jańa mektepter salynyp, jumys istep turǵan mektepter jóndelýde, sondaı-aq kommýnaldyq ınfraqurylym jańǵyrtylady. Budan basqa, ınvestısııalarǵa kólik ınfraqurylymyn damytý jónindegi jobalar — temirjol obektilerin salý, respýblıkalyq mańyzy bar avtomobıl joldaryn rekonstrýksııalaý jáne basqa da iri jobalar qosymsha qoldaý kórsetedi», — dep málimdedi Ramazan Esengazıev.
«Investısııalyq jobalardyń eleýli sany óńdeý ónerkásibinde-metallýrgııa, munaı óńdeý, gaz óńdeý, hımııa ónerkásibi jáne mashına jasaýda da iske asyrylady», — dep qorytyndylady sarapshy.
