Qazaqstan delegasııasy jınalys barysynda Iran arhıvi men kitaphanasynyń ınfraqurylymymen, atap aıtqanda qujattardy saqtaý júıesimen, qalpyna keltirý jáne konservasııalaý bólimderiniń jumysymen, sondaı-aq sıfrlandyrýdyń zamanaýı ádisterimen jan-jaqty tanysty.
Kezdesý nátıjesinde «Ǵylym ordasy» RMK bas dırektory Ular Muqajanov pen Iran Islam Respýblıkasynyń Ulttyq kitaphanasy jáne arhıvi basshysy Golıamreza Amırhanı (Gholamreza Amirkhani) ǵylym, arhıv jáne kitaphana isi salalaryndaǵy yntymaqtastyqty damytýǵa baǵyttalǵan memorandýmǵa qol qoıdy.
Ular Muqajanov bul kelisimdi eki el arasyndaǵy ǵylymı jáne mádenı baılanystardy damytý jolyndaǵy mańyzdy kezeń retinde atap ótti.
«Iranmen arhıv jáne kitaphana isi salasyndaǵy áriptestik – bul tek kásibı tájirıbe almasý ǵana emes, sonymen qatar qujattyq murany saqtaý, qalpyna keltirý jáne sıfrlandyrý baǵyttaryndaǵy ozyq tájirıbemen bólisýdiń tıimdi alańy. Mundaı yntymaqtastyq ekijaqty mádenı-ǵylymı qarym-qatynasty jańa sapalyq deńgeıge kóteredi», dedi «Ǵylym ordasy» RMK bas dırektory.
Memorandým Qazaqstan men Iran arasyndaǵy arhıv jáne kitaphana isindegi yntymaqtastyqty jańa deńgeıge kóterip, halyqaralyq seriktestikti keńeıtýdiń mańyzdy negizi boldy. Ol eki eldiń birlesken ǵylymı jobalary men sıfrlandyrý salasyndaǵy zertteýlerin júzege asyrýǵa múmkindik beredi. Bul kelisim «Ǵylym ordasynyń» halyqaralyq damýyna serpin berip, Qazaqstannyń ǵylymı jáne mádenı murasyn álemge keńinen tanytýǵa jol ashady.
