Shyǵarmashylyq keshte «Alqa» ádebı birlestiginiń músheleri aqynnyń shyǵarmashylyǵynan kórinis qoıdy. Ol «Jeńis pen jeńilis arıfmetıkasy» dep ataldy. Klýb músheleri fılologııa fakýltetiniń jas stýdent ónerpazdary. Qoıylymda aqynnyń ádildik jolyndaǵy kúreskerlik ómirdastany kórsetildi.
Keıin kórermenge beınebaıan usynylyp, aqynnyń stýdent shaǵynda jazǵan shyǵarmalarynyń qoljazbalary, muraǵatta saqtalyp qalǵan qyzyqty dúnıeleri tanystyryldy. Jurtshylyq aqyn ómiriniń osy kúnge deıin bilmeı kelgen qyzyqty tustarynyń kýási boldy. Talaı respýblıkalyq aqyndar aıtysynda top jaryp júrgen aıtysker aqyn Danııal Bolysbek Muhtar atamyzǵa arnaý arnap jyrdan sulý sózder kesteledi.
Sonymen birge jalyndy jastar aqynnyń sózine jazylǵan tanymal ánderdi shyrqady. Odan bólek qalamgerdiń eńbekterine arnalǵan kitap kórmesi uıymdastyryldy.
Shyǵarmashylyq keshte aqynnyń jubaıy Qanshaıym Shahanova sóz alyp, konsert pen kezdesý uıymdastyryp bergen jandarǵa alǵys pen rızashylyq sezimin bildirdi.
Sondaı-aq ádebıet synshysy professor Qulbek Ergóbek óz baıandamasynda Shahanovty «Adamzattyń bıigindegi aqyn» dep atady.
Kesh sońynda rýhty qalamger jınalǵan kópshilikke óziniń óleńderin oqydy. Jastarǵa salıqaly sóz ben ósıetin arnap aq batasyn berdi. Aqyn búgingi jas urpaqty tereń bilim alýǵa, qajymaı eńbek etýge óz elin súıetin shynaıy patrıot bolýǵa shaqyrdy.
Aıta keteıik shyǵarmashylyq keshti Jánibekov ýnıversıtetiniń basqarma tóraǵasy-rektor mindetin atqarýshy Gúljan Súgirbaeva júrgizdi.
ShYMKENT
