16 mamyr kúni keshkisin sarbaz ózin jaısyz sezinip, dene qyzýy kóterilgen soń Aıagóz áskerı aýrýhanasyna jetkizilgen.
«Bastapqy tekserý men em taǵaıyndalǵannan keıin de jaǵdaıy jaqsarmady. 17 mamyr kúni qosymsha zertteýler, sonyń ishinde ÝDZ men KT jasalyp, nátıjesine baılanysty ony ári qaraı em alý úshin qalalyq ortalyq aýdandyq aýrýhanaǵa aýystyrdy. 18 mamyrda sarbazdyń jaǵdaıy kúrt nasharlap, jansaqtaý bólimindegi qarqyndy emge qaramastan, ony aman alyp qalý múmkin bolmady», delingen resmı habarlamada.
Sarbaz 25 sáýir kúni Soltústik Qazaqstan oblysynan merzimdi áskerı qyzmetke shaqyrylǵan edi.
Onyń ólimine baılanysty qylmystyq is qozǵaldy. Qurlyq áskerleri qolbasshylyǵy marqumnyń otbasyna jáne jaqyndaryna kóńil aıtyp, tıisti kómek kórsetiletinin aıtty.
