Sýretti túsirgen – Oljas Qurmashev
Taǵylymy tereń is-sharany oblystyq jumyspen qamtýdy úılestirý jáne áleýmettik baǵdarlamalar basqarmasy men Taldyqorǵan qalasy ákimdiginiń qoldaýymen «Meıirim» múgedekterdiń qoǵamdyq birlestigi uıymdastyrǵan. Mundaǵy maqsat – óner arqyly qoǵamda ınklıýzıvtik sanany qalyptastyrý jáne erekshe qajettilikteri bar azamattardyń áleýetin keńinen tanytý.
Kórmege Qazaqstanmen qatar Reseı, Túrkııa, О́zbekstan syndy shet memleketterden kelgen qolóner sheberleri qatysty. Qonaqtar qoldan jasaǵan biregeı buıymdaryn tamashalap, óz tańdaýlary boıynsha satyp aldy. Sondaı-aq sheberlik sabaqtaryna qatysyp, tájirıbe almasty. Erekshe qajettiligi bar azamattar jasaǵan týyndylar kópshiliktiń nazaryn ózine aýdardy. Máselen, ulttyq naqyshtaǵy kesteli buıymdar, zergerlik áshekeıler, aǵashtan jasalǵan músinder men turmystyq zattar kórermendi eleń etkizdi.
«Biz shyǵarmashylyqtyń shekarasy joq ekenin dáleldegimiz keldi. Múgedektigi bar jandar tek kórermen ǵana emes, mádenı dıalogtiń tolyqqandy qatysýshylary bola alady. Bul kórme bizge osyny aıqyn túrde kórsetýge jol ashty. Bizdiń maqsat – jaı ǵana kórme uıymdastyrý emes, shabyttandyratyn, ózara túsinistik pen jańa múmkindikterge jol ashatyn alań qurý», dedi «Meıirim» múgedekter qoǵamdyq birlestiginiń tóraǵasy Gúlvıra Taýbaldınova.
Onyń aıtýynsha, qatysýshylar is-shara barysynda jańa seriktester men tutynýshylar taýyp, bolashaqtaǵy josparlaryn júzege asyrýǵa múmkindik aldy.
Búginde Jetisý jerinde ınklıýzııany ilgeriletý baǵytynda naqty qadamdar jasalyp jatyr. Mundaı bastamalar ár azamattyń ózin qoǵamnyń teń múshesi retinde sezinýine, óz qabiletin damytýǵa zor múmkindik beredi.
Bul kórme – ashyq ári tolerantty qoǵam qurý jolyndaǵy mańyzdy qadam. Túrli kózqaras pen múmkindiktegi adamdardy bir arnaǵa toǵystyrǵan osyndaı mádenı is-sharalar el birliginiń, rýhanı tutastyǵynyń aıqyn kórinisi.
Jetisý oblysy
