Foto: ashyq derekkóz
Depýtattyń aıtýynsha, agroónerkásiptik keshenniń turaqty damýy tıimdi qarjylandyrý júıesine tikeleı baılanysty. Alaıda qazirgi tańda sharýalar kepilzattyń jetispeýi, paıyzdyq mólsherlemeniń joǵary bolýy jáne memleket tarapynan beriletin sýbsıdııanyń keshigýi sııaqty qıyndyqtarǵa kezigip otyr.
Resmı derekterge súıensek, bıylǵy jyldyń basynda memleket tarapynan tólenbeı turǵan sýbsıdııa kólemi 350 mlrd teńgege jetken. Al 2019 jyly bul kórsetkish 36 mlrd teńge bolǵan. Qaryzdyń edáýir bóligi ınvestısııalyq jobalar boıynsha paıyzdyq mólsherlemeni sýbsıdııalaýǵa tıesili. Qazirgi tańda memleket 2035 jylǵa deıingi aralyqta bul mindettemelerdi oryndaýǵa ýáde bergen.
«Eger bıýdjette qarjy qarastyrylmasa, fermerler nesıeni 22-24 paıyzdyq mólsherlememen ózderi tóleýge májbúr. Bul – kez kelgen bıznes-josparǵa aıtarlyqtaı salmaq», dedi depýtat.
Sonymen qatar, «Damý» qory arqyly beriletin sýbsıdııalardyń da keshigip jatqanyn atap ótti. Kásipkerler qarajatty birneshe aı boıy kútýge májbúr. Bul óz kezeginde bıznestiń qarjylyq jaǵdaıyn álsiretedi.
Osy oraıda depýtat birneshe usynys aıtty:
- qarjy uıymdary men kásipkerlerdiń oblıgasııalaryndaǵy kýpondyq syıaqyny sýbsıdııalaý;
- nesıe berýshi uıymdardy keńeıtý maqsatynda ekinshi deńgeıli bankter men nesıelik seriktestikterdi tartý;
- fermerlerge qarjylandyrý kózderin tańdaýǵa múmkindik berý úshin sıfrlyq quraldardy engizý.
Sondaı-aq, Rýslan Qojasbaev Úkimetten sýbsıdııalaý júıesin turaqtandyrý, paıyzdyq mólsherlemeni tómendetý, kepil máselesin sheshý jáne agrosektordaǵy qarjylyq táýekelderdi azaıtýǵa baǵyttalǵan naqty sharalar qabyldaýdy surady.
Araılym MYRZAHAN,
EUÝ 2 kýrs stýdenti
