Qolónershi týyndylary arasynda sybyzǵydan bastap armıandardyń dýdýk, orystardyń svırel, ýkraındardyń sapel, japondardyń sıakýhatı, ejelgi Soltústik Amerıka úndisteriniń pımak, úndilerdiń bansýrı úrmeli aspaptaryna sheıin bar. Qolónershiniń osy ispen aınalysyp kele jatqanyna segiz jyldyń júzi bolypty. Mýzykalyq aspaptar jasaýdy ózi izdenip, ınternetten qarap úırengen. Sybyzǵylardy negizinen qaıyń, qaraǵash, bambýktan jasaıtynyn aıtady. Bul aǵashtar mýzykalyq dybysty jaqsy shyǵarady eken. Jalpy, alma, shıe, shabdaly sekildi jemis aǵashtarynyń bári de mýzykalyq aspap jasaýǵa jaraıdy. Sebebi olar óte qatty bolyp keledi.
«О́zime bul is óte qatty unaıdy. Aǵashtan oıý oıyp, úrmeli aspaptar jasasam rahattanamyn. Alaıda buǵan da mashyq pen tájirıbe, bilim kerek. Aǵashty oıyp tesik salýmen sybyzǵy bolmaıdy. Oıylǵan aǵash dybys shyǵarý úshin kesýdiń durys tásilin bilý kerek. Sybyzǵydan shyqqan dybys áýezdi áýenge aınalý úshin majorlyq, mınorlyq pentatonıka sekildi tehnologııalardy saqtaý qajet. Bastapqy kezde kóp qatelestim. Sybyzǵynyń túri ádemi bolǵanymen, dybysy kóńilden shyqpaıtyn. Amal joq, qaıtadan jańasyn jasaıtynmyn», dedi V.Ovcharenko.
Ańyz boıynsha, ilinip turǵan súıekti jel terbetkende odan dybys shyǵatynyn adamdar baıqap, sodan sybyzǵy jasaýdy úırengen. V.Ovcharenko mýzykalyq aspapta da jaqsy oınaı biledi. Ynta bolsa úrmeli aspapta oınaýdy bir aıda meńgerip alýǵa bolatynyn aıtady. Onyń sózinshe úrmeli aspaptarda ár halyqtyń ulttyq kody jasyrynǵan. Olardy oınaý arqyly ata-baba rýhymen syrlasqandaı bolasyz.
«Úrmeli aspaptardyń ózindik qudireti bar. Olardan shyqqan áýen júrekke jetedi. Jalpy, sybyzǵy ataýly Jaratýshyǵa eń jaqyn aspap sanalady. Kóne grek mıfologııasyndaǵy qudaılar da, úndiniń Krıshna qudaıy da úrmeli aspapta oınaǵan. Sybyzǵynyń túri kóp. Máselen, kóńil kótergim kelse qazaqtyń sybyzǵysyn tartamyn. О́ıtkeni ol adam janyn jadyratady. Tereń oıǵa shomǵym kelse, Soltúsik Amerıka úndisteriniń mahabbat sybyzǵysy – pımakty qolyma alamyn. Osylaısha, úrmeli aspaptarmen adam janyn da emdeýge bolady», dedi keıipkerimiz V.Ovcharenko.
ShYMKENT
