Sondyqtan dál osy kúnderi «Almaty» áleýmettik-kásipkerlik korporasııasy elektrmen qýattandyratyn stansııalardy (EZS) ornatý úshin 311 jer telimin bóldi. Árbir ýchaskede konkýrstyq irikteýden ótken otandyq ınvestorlar eki kólik sııatyn, qýaty 60 kVt-tan bastalatyn bir EZS ornalastyrady. Barlyq stansııalar paıdalanýǵa berilgennen keıin qalada elektromobılderdi qýattandyrýǵa arnalǵan 622 jańa oryn paıda bolady.
Bir ýchaskege ınvestordyń eń tómengi salymy 10 mln teńgeni quraıdy. Bul rette halyq úshin akkýmýlıatorlyq batareıany zarıadtaýdyń 1 kVt úshin shekti quny QQS esebimen 100 teńgeden aspaıdy. Jer ýchaskeleri ınvestorlarǵa 4 jyl merzimge uzartýǵa artyqshylyq berý quqyǵymen berildi.
Kólikterdi qýattandyrý stansııalaryn qala turǵyndary kóptep baratyn – bazarlar, saıabaqtar, kafeler sııaqty qoǵamdyq oryndarda ornatý kózdelingen. Barlyq stansııalar bıylǵy jyldyń sońyna deıin paıdalanýǵa beriledi.
Búgingi tańda Almatyda jeke aýmaqtarda 300-den astam EZS ornatylǵan. Jańa nysandardy qosqanda qazir Almatyda qýattandyrý stansııalarynyń jalpy sany 600-den asady.
EZS qurylysy «2029 jylǵa qaraı barlyq iri qalalarda elektromobılder úshin qajetti ınfraqurylymdy qurý jónindegi jol kartasy» sheńberinde júzege asyrylady. Joba Almatydaǵy ekologııalyq jaǵdaıdy jaqsartý qajettiligine baılanysty, sondaı-aq megapolıstegi elektr kólikteriniń sany ósip kele jatqandyqtan qolǵa alynyp otyr.
