ASTANA. 21 maýsym. Aqparat jáne baılanys qyzmetkerleriniń kúni merekesine oraı «Qazkontent» aksıonerlik qoǵamynyń uıymdastyrýymen BAQ ókilderiniń arasynda asyq atýdan jarys ótti. Bul týraly egemen.kz habarlady.
Alǵash ret uıymdastyrylǵan saıysqa 8 komanda qatysty. Olardyń arasynda «Ortalyq kommýnıkasııalar qyzmeti» RM, «Qazaqstan» ulttyq telearnasy, «Egemen Qazaqstan» jáne «Kazahstanskaıa pravda» respýblıkalyq gazetteri, Bas redaktorlar klýby, «QazAqparat» halyqaralyq aqparattyq agenttigi, «Astana» telearnasy, sondaı-aq, «Qazkontent» aksıonerlik qoǵamy komandalary boldy.
Sonymen, erler asyq atý oıynynan mergendikterin synasa, qyzdar «bes asyq» (bes tas) oıyny arqyly eptilikterin kórsetti.
«Han Shatyr» oıyn-saýyq ortalyǵynda ótken jarysta asyq atýdan birinshi oryndy «Astana» telearnasy jeńip aldy. Ekinshi orynǵa «Ortalyq kommýnıkasııalar qyzmeti» jaıǵassa, úshinshi tuǵyrǵa «Egemen Qazaqstan» komandasy kóterildi. Al «bes asyq» boıynsha «QazAqparat» agenttiginiń jýrnalısi Saıa Jarylqasyn 1-orynǵa ıe boldy.
Aıta keteıik, uıymdastyrýshylar sharany ótkizýdegi maqsat jas býyn arasynda asyq atý ulttyq oıynyn nasıhattaý, ulttyq sportty damytý jáne halyqty salaýatty ómir saltyna shaqyrý ekenin aıtty.
Talǵat Raıymbek.
Derek: egemen.kz.
Sýret: Almas Manap.
