«Áskerdegi azamattyń qyzmetindegi ana danalyǵy» uranymen ótken bul shara armııa, memlekettik qurylymdar men azamattyq qoǵam ókilderi arasyndaǵy ashyq dıalog alańyna aınaldy.
Forýmǵa Parlament Májilisiniń depýtattary, atqarýshy bıliktiń, beıindi mınıstrlikter men vedomstvolardyń, Memlekettik kúzet qyzmetiniń, UQK Shekara qyzmetiniń, Ulttyq ulannyń, Tótenshe jaǵdaılar mınıstrliginiń ókilderi, sondaı-aq «Analar júregi» sarbazdar analary komıtetiniń jáne onyń óńirlik fılıaldarynyń músheleri qatysty.
Qorǵanys mınıstri general-polkovnık Rýslan Jaqsylyqov óz sózinde áskerı qyzmetshilerdiń otbasylaryn armııanyń qoǵamdyq ómirine belsendi tartý jáne áskerge shaqyrylýshylardyń moraldyq jáne patrıottyq qasıetterin qalyptastyrýdaǵy ananyń róli arqyly halyqtyń áskerı qyzmetke degen senimin nyǵaıtýdyń mańyzdylyǵyn atap ótti.
Dóńgelek ústel barysynda Qorǵanys mınıstrligi, Ulttyq ulan, UQK Shekara qyzmeti, Áskerı prokýratýra, Densaýlyq saqtaý mınıstrligi men Ǵylym jáne joǵary bilim mınıstrligi ókilderiniń baıandamalary tyńdaldy. Merzimdi qyzmet ótkerý sharttary, áskerı qyzmetshilerdi zattaı múlikpen jáne tamaqpen qamtamasyz etý, áskerge shaqyrýdyń ashyqtyǵy, otbasylarmen ózara qarym-qatynas, moraldyq-psıhologııalyq qoldaý, sarbazdardy quqyqtyq qorǵaý jáne merzimdi qyzmettegiler úshin bilim berý múmkindikteri máseleleri talqylandy.
«Analar júregi» sarbazdar analary komıtetiniń tóraıymy Lılııa Haırýllına áskerı bólimderdiń basshylyǵymen dıalog qurýdyń jáne áskerdegi qyzmettiń qaýipsiz, áleýmettik turǵyda qorǵalǵan jáne bedeldi bolýǵa jaǵdaı jasaýdyń mańyzdylyǵyn atap ótip, sonda jastar armııaǵa óz erkimen barady, al olardyń týystary komandırlerge senim artady dedi.
Forýmda uıymdastyrylǵan jaýyngerlik daıyndyqta úzdik nátıjelerge qol jetkizgen uldardyń analarymen kezdesýleri tosynsyı boldy. Jas jaýyngerlerge 10 kúndik demalys berilip, yntalandyryldy. Osyndaı laıyqty uldar tárbıelegen analarǵa vedomstvolar men sarbazdar analary komıteti basshylarynyń atynan gramotalar, alǵys hattar jáne baǵaly syılyqtar tabys etildi.
Forým qorytyndysy boıynsha usynystardyń resmı hattamasy oryndaýshylardy, merzimderin jáne kútiletin nátıjelerdi naqty belgileı otyryp, toltyryldy, bul barlyq tartylǵan taraptardyń odan ári birlesken is-áreketiniń jol kartasy bolmaq.
