Foto: Ashyq derekkóz
Memlekettik kirister komıtetiniń habarlaýynsha, OpenAI kompanııasy ázirlegen tanymal ChatGPT júıesi endi Qazaqstan aýmaǵynda kórsetilgen sıfrlyq qyzmetteri úshin qosylǵan qun salyǵyn (QQS) tóleıtin bolady. Bul qadam transulttyq IT-kompanııalarǵa ádil salyq salýdy qamtamasyz etýde mańyzdy kezeń sanalady.
«ChatGPT — bul jasandy ıntellektige negizdelgen chat-bot. GPT (Generative Pre-trained Transformer) tildik modeli negizinde jumys isteıdi jáne kelesideı múmkindikterge ıe:
- suraqtar men ótinishterdi túsiný;
- maǵynaly ári qısyndy jaýaptar qurastyrý;
- aýdarma, hat jazý, kodtaý, oqý jáne basqa da salalarda kómek kórsetý.
ChatGPT-ti vırtýaldy kómekshi, keńesshi, suhbattasýshy nemese shyǵarmashylyq pen jumysqa arnalǵan qural retinde paıdalanýǵa bolady», delingen habarlamada.
Aıta keteıik, sıfrlyq qyzmetterge salyq salý tájirıbesi elimizde 2022 jyldan beri júzege asyrylyp keledi. «Google salyǵy» retinde belgili bul mehanızm sheteldik IT-alyptardyń el ekonomıkasyna ádil úles qosýyn qamtamasyz etedi.
Memlekettik kirister komıteti sıfrlyq platformalarmen ózara is-qımyldy jetildirý, zańnamany saqtaý jáne salyq túsimderin ulǵaıtý baǵytynda jumysyn odan ári jalǵastyrady.
