Forým uıymdastyrýshylarynyń málimetinshe, sheteldik qonaqtar qalanyń 37 iri qonaqúıinen bólmelerge tapsyrys bergen. 2025 jylǵy 26-31 mamyr aralyǵynda 4 juldyzdy qonaqúılerdiń tolymdylyǵy 50-90% aralyǵynda bolsa, 5 juldyzdy qonaqúılerde bul kórsetkish 90-100%-ǵa jetken.
Salystyrar bolsaq, 2024 jyldyń osy kezeńinde 4 juldyzdy qonaqúılerdiń tolymdylyǵy 30-60%, al 5 juldyzdylarda 50-60% deńgeıinde bolǵan.
Ortasha eseppen, Astanaǵa kelgen bir isker týrıstiń shyǵyny 177 myń teńgeni quraıdy. Bul somaǵa qonaqúıde turý, tamaqtaný, kólik qyzmetteri, oıyn-saýyq pen saýda kiredi. Qonaqtardyń ortasha bolý uzaqtyǵy — 3 kún.
Sheteldik qonaqtardyń kelýiniń mýltıplıkatıvtik áseri 2,6 mlrd teńgeden asady dep baǵalanýda. Bul óz kezeginde mundaı halyqaralyq is-sharalardyń Astana men jalpy el ekonomıkasy úshin mańyzdylyǵyn kórsetedi.
Astana International Forum 2025 jyldyń 29-30 mamyry kúnderi ótedi.
Forýmnyń bas seriktesi — «Samuryq-Qazyna» UÁQ» AQ, bas demeýshisi — «ERG Kómek» korporatıvtik qory, al resmı banki — «Frıdom Bank Qazaqstan» AQ. Buǵan qosa, forýmdy elimizdiń birqatar iri kásiporyndary men kompanııalary qoldaýda.
