«2025 jylǵy 23 mamyrda Almaty oblysyndaǵy «Azııa Agro Fýd» quramajem zaýyty aýmaǵynda oryn alǵan qaıǵyly oqıǵa saldarynan áriptesterimizdiń qaza tapqany týraly zor kúızelispen jáne qaıǵymen habarlaımyz. Bul oqıǵa búkil kompanııamyz úshin aýyr soqqy boldy. Biz tek qyzmetkerlerimizden ǵana emes, ujym ómirinde tereń iz qaldyrǵan adal, eńbekqor ári adamgershiligi joǵary jandardan aıyryldyq», delingen habarlamada.
«Azııa Agro Fýd» marqumdardyń týystary men jaqyndaryna shyn júrekten kóńil aıtady.
«Biz bul qaıǵyny birge bólisemiz jáne osyndaı qıyn kezeńde otbasylarǵa barynsha qoldaý kórsetýge tyrysamyz. Zańda jáne korporatıvtik baǵdarlamalarda qarastyrylǵan saqtandyrý tólemderinen bólek, kompanııa tarapynan marqumdardyń otbasyna qosymsha materıaldyq kómek kórsetiledi. Jerleý rásimderine baılanysty barlyq shyǵyndy óz moınymyzǵa alamyz, sondaı-aq marqum áriptesterimizdiń múmkin bolatyn qaryzdaryn tolyq óteımiz. Árbir otbasyna psıhologııalyq jáne quqyqtyq kómek beriledi, qajet bolǵan jaǵdaıda jeke kómek te uıymdastyrylady», dep málimdedi kompanııa ókilderi.
Kompanııa jan-jaqty kómek kórsetýge ýáde berdi.
Qazirgi ýaqytta oqıǵanyń sebepterine baılanysty muqııat tergeý jumystary júrgizilip jatyr.
Buǵan deıin «Azııa Agro Fýd» basshylyǵy 23 mamyr kúni Jibek Joly aýylynda jarylys bolǵanyn rastaǵan bolatyn. Aldyn ala málimet boıynsha, oqıǵaǵa un tozańynyń jarylysy sebep bolǵan, bul órttiń tutanýyna ákelgen. Kompanııa basqarma tóraǵasy Saıan Ashenov qazirgi ýaqytta oqıǵanyń barlyq mán-jaıyn anyqtaý úshin ishki tekserý júrgizilip jatqanyn habarlady.
Aıta keteıik, jarylys saldarynan bir adam mert bolǵan. Taǵy úsh jumysshy aýyr kúıik alyp, deneleriniń 80–90%-yn kúıik shalǵan. Barlyǵy jedel túrde jansaqtaý bólimine jetkizilgen.
