Májilis depýtaty Juldyz Súleımenovanyń aıtýynsha, nysanaly kapıtal qorlary (endaýment-qorlar) týraly jáne osy salaǵa qatysty birqatar zańnamalyq aktilerge ózgerister engizýdi kózdeıtin zań jobalary elimizde mundaı qorlardy qurý men damytý úshin quqyqtyq negiz qalyptastyrady.
«Atalǵan zań jobalary Memleket basshysynyń tapsyrmasyn iske asyrý sheńberinde Úkimet tarapynan ázirlenip, 2024 jyldyń 27 naýryzynda Májiliske engizildi. 2025 jyldyń 16 sáýirinde jalpy otyrysta birinshi oqylymda maquldandy», dedi depýtat.
Depýtattyń aıtýynsha, zań jobasy aıasynda jumys tobynyń talqylaýy barysynda birqatar mańyzdy túzetýler engizilgen. Atap aıtqanda:
-
aktıvterdi senimgerlik basqarýǵa berý shegi 15 000 AEK-ten 10 000 AEK-ke deıin tómendetildi;
-
ákimshilik-sharýashylyq shyǵystardyń shekti kólemi ınvestısııalyq tabystyń 30%-ynan 15%-yna, al aktıvterdiń ortasha taza qunynyń 1%-ynan 0,5%-yna deıin qysqartyldy;
-
qor alýshynyń jazbasha kelisimin alý talaby engizildi;
-
qoldanystaǵy qorlardy qaıta tirkeýdi mindetteıtin ótpeli normalar alynyp tastaldy;
-
qamqorshylyq keńes pen atqarýshy organnyń ókilettikteri naqtylandy;
-
múlik pen zııatkerlik menshik obektilerin basqarý tártibi naqty aıqyndaldy.
Sonymen qatar, ilespe zań jobasy aıasynda kelesi zańnamalarǵa ózgerister engizildi:
-
«Aýdıtorlyq qyzmet týraly» Zań – endaýment-qorlardy mindetti syrtqy aýdıt júrgiziletin uıymdar qataryna qosý;
-
«Býhgalterlik esep pen qarjylyq eseptilik týraly» Zań – qorlardy qoǵamdyq múdde tanytatyn uıymdar retinde taný;
-
«Ǵylym jáne ǵylymı-tehnıkalyq saıasat týraly» Zań – memleket qatyspaı qurylǵan akademııalardyń ataýynda «ulttyq» sózin qoldanýǵa tyıym salý.
«Bul túzetý boıynsha, eger osyndaı akademııalar bir jyl ishinde ataýyn ózgertpese, olar ýákiletti organnyń sotqa júginýi arqyly taratylýy múmkin», dep túsindirdi depýtat.
Sonymen qatar, Túrkistan oblysyndaǵy Kentaý qalasy men oǵan irgeles eldi mekender (Búrgem, Ashysaı, Hantaǵy, Baıyldyr, Qarnaq, Qúshata jáne Shashtóbe) ekologııalyq ahýaldyń aldyn alý aımaǵy dep tanylatyn boldy. Bul ózgeris «Aral óńirindegi ekologııalyq qasiret saldarynan zardap shekken azamattardy áleýmettik qorǵaý týraly» Zańǵa engizildi.
Májilis depýtattary zań mátinin zań tehnıkasy talaptaryna sáıkestendirý úshin birqatar redaksııalyq ózgerister de engizdi.
«Quqyqtyq aktiler týraly» Zańnyń 24-babyna sáıkestik maqsatynda, zań jobalarynyń ataýlary naqtylandy, dedi Juldyz Súleımenova.
Parlament Májilisiniń barlyq komıtetteri zań jobalary boıynsha oń qorytyndy berdi. Komıtettiń jumys toby 20 otyrys, al keńeıtilgen quramda 2 otyrys ótkizgen. Qorytyndy salystyrý kestesine sáıkes, negizgi zań jobasy boıynsha 174, al ilespe zań jobasy boıynsha 24 túzetý engizilgen.
«Sondyqtan osy Zań jobalaryn qabyldap, Parlament Senatyna jiberýdi suraımyn», dep qorytyndylady depýtat Juldyz Súleımenova.
